شەفەق نیوز - بەغداد

وەزیر نەفت باسم محمد خوزەیر عەبادی، ئمڕوو شەممە، رێنمایی دا وە زویکردن رێکارەیل پرۆژەی لۊلەی هەناردەکردن ستراتیژی و خەسەوکردن باسەیل تەکنیکی و بازرگانی ئەرا رەسین وە قۆناغ واژووکردن گریەبەسەگە لە زۊترین وەخت، و یەیش لە گردەوبوینیگ فراوان کە سەرکردایەتییە باڵایەیل لە وەزارەتەگە گردە خوەی.

 بەیاننامەیگ لە وەزارەتەگە دیاری کرد، کە جینشین وەزارەتەگە ئەرا کاروبار دەرهاوردن نەسر عەزیز، و هەردوگ وەڕێوەبەر گشتی لە هەردوگ کۆمپانیای نەفت بەسرە و نەفت باکوور، بیجگە لە کادرە سەرکردەییەیل، ئامادەی گردەوبوینەگە بۊن ئەرا باس لە گامەیل کرداری ئەرا پرۆژەی لۊلەی هەناردەکردن ستراتیژی (بەسرە - حەدیسە - فیشخابوور) و (حەدیسە - بانیاس).

بەیاننامەگە دیاری کرد کە پرۆژەگە وە یەکیگ لە پرۆژە گرنگە گەورەیل هەژمار کریەێد کە ئامانج دیرێد ئەرا هەمەجۊرکردن دەروازەیل هەناردەکردن نەفتی ئەرا عراق، وە توانایگ هەناردەکردن گەورە کە وە دوو ملیۆن و 250 هەزار بەرمیل لە رووژیگ مەزەنە کریەێد.

وتیش کە میکانیزمەیل جیوەجیکردن پرۆژەگە لەلایەن هاوپەیمانییگ خریاسە روی کە کۆمپانیا جەهانییەیل لەخوەی گرێد، کە ئەوانیش: "شیڤرۆن" و "Ti کاپیتاڵ" ئەمریکی، و کۆمپانیای "UCC" قەتەری.

 عەبادی لە کووتایی گردەوبوینەگە دووپات کرد لەبان گرنگی ستراتیژی و ئابووری کە پرۆژەگە ئەرا ئایندەی عراق نوێنەرایەتی کەێد، و خاسەوکردن ژیرخانەیلی لە کەرت وزە.