شەفەق نیوز - رۆما / بەغداد

فوئاد حوسەین وەزیر دەیشت عراق، راگەیان، کە عراق زیانەیلیگ وەخوەیەو دی کە مەزەنە کریەێد وە نزیکەی 60 ملیار دۆلار لە ماوەی جەنگ دۊایین لە ناوەین ئەمریکا و ئیران، وە دووپاتکردن ئەوە کە وەردەوامبۊین جەنگ بەشداری کرد لە خەراوەوبۊن قەیران وزەی جەهانی و زیایبۊن ترسەیل لە بەرزەوبۊن رێژەیل هەڵاوسان، وە شیوەیگ کە رەنگ دەێدەو وە خەراوی لەبان ئابوورییەیل فرەیگ لە دەوڵەتەیل جەهان، و لەلییان دەوڵەتە ئەوروپییەیل.

یەیش لە ماوەی دیداریگ دۊەکە پەنجشەممە وەرد ئەنتۆنیۆ تایانی جیگر سەرۆک وەزیرەیل و وەزیر دەیشت و هاریکاری ناودەوڵەتی ئیتالی هات، لە بارەگای وەزارەت دەیشت ئیتالی لە رۆمای پایتەخت، ئەرا باسکردن لە پەیوەندییە دووانیەیل و رێگەیل وەهیزکردن هاوکاری هاوبەش، بیجگە لە گفتوگۆکردن لە پیشهاتە هەرێمی و ناودەوڵەتییەیل، وەپەی بەیاننامەیگ لە وەزارەت دەیشت عراقی ئمڕوو جمعە.

 فوئاد حوسەین باس پیزانین عراق ئەرا هەڵوێستەیل ئیتالیا، حکومەت و گەل کرد، کە پاڵپشتیکارە ئەرا عراق لە ماوەی ساڵەیل گوزەشتە لە جەنگی دژ وە تیرۆر و شکانن ریخریاگ داعش، وە بەرزنڕخانن تەقەلا وەردەوامەیلی لە مەشقپیکردن هیزەیل پۆلیس سەر وە وەزارەت ناوخۆی فیدراڵی و هیزەیل پێشمەرگە لە هەرێم کوردستان عراق.

 وەزارەت دەیشت عراقی لە بەیاننامەگەی وتیش کە هەردوگ لا باس لە ئاسووەیل وەرەونواچگن هاریکاری ئەمنی و سەربازی لە قۆناغ ئایندە کردن، وە تایبەت لە ژیر رووشنایی ئەو ئاڵشتکارییەیلە کە پەیوەندی وە قۆناغ دۊای کۆتاییهاتن ئەرک هاوپەیمان ناودەوڵەتی لە عراق دیرن، بیجگە لە گفتوگۆکردن لەبان شمارەیگ لە دۆسیە دارایی و سەربازییە هەڵوەساریاگەیل وەرد حکومەت و کومپانیا ئیتالییەیل، کە گلەو خوەن ئەرا سەردەم رژیم وەرین.

 وەپەی بەیاننامەگە، دیدارەگە باس لە دەرئەنجامەیل وەردەوامبۊن جەنگ رووسی ئۆکرانی و رەنگداینی لەبان ئاسایش ئەوروپی کرد، بیجگە لە پیشهاتەیل ململانێەگە لە ناوچەگە و کاریگەرییەیل لەبان عراق و دەوڵەتەیل کەنداو عەرەبی.

 فوئاد حوسەین دووپات کرد لە هەوەجەی وەرگردن رۆڵیگ کارا لەلایەن یەکێتی ئەوروپا و دەوڵەتە ئەوروپییەیلەو، و لەناویانیش ئیتالیا، لە پاڵپشتیکردن دەسپێشخەرییە ئاشتیانەیەیل، و کارکردن لەبان نزیکەوکردن نووڕینەیل لە ناوەین لایەنەیل ململانێەگە، و هاندانەیل ئەرا گلەوخواردن وەرەو مێز دانوسەنین، وە شیوەیگ کە بەشداری بکەێد لە کۆنترۆڵکردن ئاڵۆزییەگە و دویرکەفتن لە فراوانەوبۊن بازنەی رویوەڕویبۊن.

لە لای خوەیەو، ئەنتۆنیۆ تایانی ئافرەین لە پەیوەندییە عراقییە ئیتالییەیلەو  کرد، وە دووپاتکردن پاڵپشتی ئیتالیا ئەرا عراق لە بوارەیل جویراجویر.

و لە کۆتایی دیدارەگە، هەردوگ لا رێک کەفتن لەبان وەردەوامبۊین پەیوەندی و هەماهەنگی لەباوەت ئەو پرسەیلە کە جی گرنگیپیدان هاوبەشن، لە وەختیگ فوئاد حوسەین مکیسنامەیگ دادە هاوتا ئیتالییەی ئەرا سەردانیکردن عراق.