شەفەق نیوز/ فوئاد حسێن وەزیر دەرەوە، ئمڕوو دووشەممە، راگەیان عراق داوا لە ئیران کرد دەسوەردان بکەێد ئەرا وسانن ئامانجکردن ناوچەی خەزڕا، و ئاماژە کرد ک شایەت واشینتۆن ئەگەر پەلامار باڵیۆزخانەی بکریەێد ریکارەیل سەختیگ بوەێد.

لە باسکردنیگ وەگەرد تەلەفزیۆن «عەرەبیە» وت: بەغداد وەگەرد شاندە دبلۆماسیەگان کار ئەرا دابینکردن مقەیەتی شاندە دبلۆماسیەگان کەێد، و ئاماژە کرد ک پەلامارە مووشەکیەگان لەبان ناوچەی خەزڕا دەسپاچەی حکومەت کەن.

و ئاشکرا کرد ک هێزە عراقیەگان ژمارەیگ لە جیوەجیکەرەیل پەلامارەگان لەبان ناوچەی خەزڕا دەسگیر کردن، وتیش؛ تەقەلای فرەیگ ئەرا وسانن ئەو پەلامارەیلە دەێد.

و هەمیش ئاماژە کرد ک حکومەتەگە کار ئەرا نواگردن چەک بەڕەڵا لە وڵاتەگە کەێد، وەرجە ئەنجامدان هەڵبژاردنەگە، ک باس لە بەشداریکردن نەتەوە یەکگرتووەکان لەناوی کرد ئەرا مسۆگەرکردن سەرکەفتنی.

حسێن وتیش؛ عراق خوازين ئەرا هێزەیل هاوپەیمانی ئەرا نواگردن داعش و ڕاهێنان دیرێد، و دیاری کرد ک ریخریایەگە هیمان لە ناوچە سنووریەگان وەگەرد تورکیا هەسەی.

وەزیر دەرەوە، دەسوەردانە دەیشتیەگان لە باوەت ناوخۆیی وڵاتەگە رەت کرد، و جەخت کرد ک ئاڵوزیەگە لەناوبەین واشینتۆن و تەهران کاریگەری خراویگ لەبان مەیدان عراقی دیرێد.

دەربارەی پەیوەندیەگان وەگەرد سعودیە، حسێن ئاماژە ئەرا گەشەکردن گەورایگ لە پەیوەندیەگان وە گەرد سعودیە لە باوەتەیل فرەیگ کرد.

وهەمیش دیاری کرد ک عراق نووڕێدە کارکردن وەگەرد ئیدارەی سەرۆک جۆ بایدن.