شەفەق نیوز/ سەرچەوەیگ ئەمنی لە بەغدای پایتەخت، ئمڕوو سێشەممە، خەوەردا ک بەسیان ری وپیەڵەیل وەرەو مەیدان تەحریر، ناوڕاس بەغداد، قەرەباڵغ سەختیگ لە ریوبانەیل ناو پایتەختەگە دروس کردیە.
سەرچەوەگە ئەرا ئاژانس شەفەق نیوز وت: پیەڵ جمهوریە و سنەک و قادسیە بەسیانە، و هەمیش گشت ریەیل وەرەو تەحریر وتەواوی بڕیانە.
سەرچەوەگە وتیش: پیەڵ موعەلوق و دەروازەیل خەزرا تەنیا ئەرا خاوەن باجەیل وازە.
سەرچەوەگە وتیش " پیەڵ دووقاتی، و هەمیش پیەڵ جادریە تا زانکۆی بەغدا بەسیایە، و پیەڵ یاریگای شەعەب لەوەر بڕیان بەشیگی قەرەباڵغە.
سەرچەوەگە وتیش: ریەگە لە چواڕیان دۆرە وەرەو مزگەفت ئوم تبولیش قەرەباڵغە.
دویەکە دووشەممە، سەرچەوەیگ ئەمنی خەوەردا لە بڕیان پیەڵەیل سنەک و جمهوریە وریەیل وەرەو مەیدان تەحریر و ناوچەی خەزرا لەناوڕاس بەغداد.
لە یەک تەشرین لایەنگرەیل تەشرین دەسکردنە خوەینشاندان لە مەیدان تەحریر و نسور لە بەغداد، ئەرا سێیەمین ساڵیان "راپەڕینیان" دژوە ئی چین سیاسیە.
خوەینشانداندەرەیل هەڕەشەی سیاسیەیل دان ک لە رووژ ٢٥ تەشرین، ک کەفێدە ئمڕوو سێشەممە دووارە گلەو بخوەن، تا سێیەمین ساڵیاد ئەو خوەینشاندان فراوانە زنیەو بکەن.