شەفەق نیوز - بەغداد
سەرچەوەیگ ئاگادار، ئمڕوو شەممە، خەوەردا کە سەرۆک وەزیرەیل عەلی زەیدی رێنمایی داگە وە بەسانن مەرزە هشکانییەیل هاوسنوور وەگەرد ئیران چۊ سزاییگ ئابووری ئەرا رژیم لە تاران دۊای چەسپیان تیکەڵبۊنی لە جیوەجیکردن پەلامارەیل وە فڕۆکەیل بی فڕۆکەوان کە لۊلەیل نەفت لە سعودیە کردنە ئامانج لەناو خاکەیل عراقییەو.
چش پڕسەرچەوەگە لە لێدوانیگ ئەرا ئاژانس شەفەق نیوز، مدوو بەسانن ئی مەرزەیلە گلەو دا ئەرا رەدکردن مادە و چەک و کەرەستەیل دروسکردن فڕۆکەیل بی فڕۆکەوان لە ئیرانەو وەرەو عراق کە گرووپەیل پەلامار سعودیە وەپیان دان.
دیاری کرد کە بەسانن مەرزەیل و وە تایبەت شەلامچە و شیب و مەنەلی وە بڕیاریگ کەسی لەلایەن سەرۆک وەزیرەیلەو هاتگە، و لە نووسینگەی تایبەت خوەی دەرچگە، و لیژنەیل لێکۆڵینەوە دروس کردنە ئەرا ئاشکراکردن چۊنیەتییەیل ئەو مادەیلە کە رەد کریانە و ئەو پیشێلکارییەیلە لەلایەن هیزەیل ئەمنی و لایەنە فەرمییەیلەو، و پرسیارکردن لەو لایەنەیلە کە تیکەڵن.
سەرچەوەگە وەدۊای قسەیلی هاورد کە بەسانن مەرزەیل هەمیش چۊ سزاییگ ئابووری هاتگە لەبان بنەمای تەقەلای کیشانن گرووپەیل عراقی گریەدار وە ئیران ئەرا کیشانن وڵاتەگە ئەرا ناو ململانێ هەرێمی کە لە ناوچەگە هەس.
یەیش هاوەختە وەگەرد دووپاتکردن شانەی راگەیانن ئەمنی، لە وەختیگ گوزەشتە لە ئمڕوو، کە لایەنە ئەمنییە تایبەتمەنەیل دەس کردنە وە جیوەجیکردن ئۆپەراسیۆنەیل ریکخستن کارگێڕی و ئەمنی لە شمارەیگ لە مەرزە سنوورییەیل، ئەوەگ هەوەجە کەێد بەسیەین، ئەوەیش دۊای پەلاماریگ کە سعودیە کردە ئامانج لەناو خاکەیل عراقییەو.
شانەگە لە بەیاننامەیگ فەرمی دیاری کرد کە لایەنە ئەمنییەیل زنجیرەیگ لە رێکارە یاساییەیب گردنەسە وەر و کار هەواڵگری و لێکۆڵینەوە و وەشکین خەسەو کردنە ئەرا زانستن چۊنیەتییەیل ئەو پیشێلکاری و سەرپیچییەیلە کە لەی مەرزەیلە رۊی دانە و دانان چارەسەرەیل گونجیاگ ئەرایان، وە ئاگادارکردن هاووڵاتییەیل و گەشتیارەیل، کە هەردوگ مەرز زورباتیە و مەنزریە لە وەردەم جۊلەی گەشتیارەیل وازن.
لەلای خوەیەو، ئەندام دەسەی ئاسایش و وەرگری پەرلەمانی سەقەر محمداوی، ئاشکرا کرد کە پەیوەندییگ راستەوخۆ وەگەرد وەڕێوەبەر نووسینگەی فەرماندەی گشتی هیزە چەکدارەیل عەبدولئەمیر شەمەری ئەنجام داگە ئەرا وازکردن مەرزە سنوورییە بەسیاگەیل.
و محمداوی ئەرا ئاژانس شەفەق نیوز وت، کە ئیسە رێککەفتن وەگەرد نووسینگەی فەرماندەی گشتی کریاگە لەبان وازکردن مەرزەیل ئەرا ماوەی سێ سەعات ئەرا ریەداین وە دەرچگن عراقییەیلە کە لە ئیران گیر خواردنە و گلەوخواردن ئەرا خاک نیشتمان.
لەلای خوەییشەو، سەرۆک دەسەی راگەیانن ئەمنی فەریق سەعد مەعن لە بەیاننامەیگ، دووپات کرد لەبان ریداین وە چگن و دەرچگن ئەرا گەشتیارەیل عراقی کە گیر خواردنە لە هەردوگ مەرز شەلامچە و شیب وە رێنماییگ لە فەرماندەی گشتی هیزە چەکدارەیلەو.
لە بەغداد، سەرۆک وەزیرەیل عەلی زەیدی داوای لێکۆڵینەوە وەگەرد فەرماندەیی ئۆپەراسیۆنەیل میسان کرد، دۊای چەسپیان دەرچگن ئەو دەسدریژییەیلە کە سعودیە کردنە ئامانج لە پارێزگاگەو، هەمیش بڕیار لەکارلاوردن فەرماندەی ئۆپەراسیۆنەیل میسان دا.
زەیدی دووپات کرد کە حکومەتەگەی "سستی نییەکەێد وەگەرد هیچ چالاکییگ کە عراق یا پەیوەندییەیلی وەگەرد وڵاتەیل دووس بخەێدە وەر رخباری"، لە وەختیگ بەغداد تەقەلا دەێد ئەرا کۆنتڕۆڵکردن لیکەفتەیل وەکارهاوردن خاکەیل عراقی لە جیوەجیکردن دەسدریژییەیل لەبان شانشینەگە.
هەمیش حکومەت عراقی گام نا ئەرا بەسانن مەرزەیل شەلامچە و شیب و مەندەلی وەگەرد ئیران وە شیوەیگ تەواو، لە چوارچیوەی ئەو رێکارەیلە کە گیريانەسە وەر لەبان بنەمای پیشهاتە ئەمنییە دۊاییەیل.
سعودیە دۊکە جمعە، راگەیان کە کڕ لۊلەیل "خوەرەڵات خوەرئاوا" لە هەردوگ ناوچەی ریاز و مەدینەی مونەوەرە کریانەسە ئامانج وە چەن "فڕۆکەیگ بی فڕۆکەوان کە لە عراقەو هاتنە"، دەسنشان کرد ئەرا ئەوە کە "هەڵوژارد وەڵام نەیەێدەو لەی قۆناغە، و پشتگیری تەقەلایەیل حکومەت عراقی بکەێد".