وەسفی مورتەزا تمیمی وەڕیەوبەر ناحیەی قەرەتەپە ئەرا ئاژانس شەفەق نیوز وت: لانە و حەشارگەیل داعش هیمان مەنیە هەر ماوەی جاریگ نووە بوون لە ناوچەی نارین باکوور خوەرھەڵات ناحیەگە لە نزیک سنوور کوردستان لەوەر ئەو بۆشاییەیل چووڵ فراوانە و تەپە سەختەیل ک کەرتەیل ئەمنی لەناویان نییە.

تمیمی دیاری کرد ک ناوچەی نارسن جویر سێسویکەیگ کەفتیەسە ناوبەین دەریاچەی حەمرین و قەرەتەپە و جەلەولا و ناحیەی سەعدیە و ٤٠ کم2 لەلای ئارام نییە و زاڵبوین وەبانی وە سوپای هشکایی وەبی پەلامار ئاسمانی وەردەوام و فڕۆکەیل بیفڕۆکەوان سەختە.

تمیمی هشکەوبوسن دەریاچەی حەمرین و نەمان ئاوی وە رووبەر فراوانیگ وە زاقترین هوکاریل وەردەوامی حەشارگەیل داعش زانست، دویای ئەوەگ دەریاچەگە بویە ری و پەنایگ ئەرا ئەندامەیل داعش لە دەورگردی و دویر لە کەرتەیل ئەمنی.

 وەڕیەوبەر قەرەتەپە وتیش: دەزگایل هەواڵگری وەردەوامن لە رەوانگەکردن لانە و حەشارگەیل داعش لەناوچەی نارین و گورزەیل ئاسمانی فرەیگ وەشانە بان ئەو شوینەیلە ک دەیان لە ئەندامەیل داعش کوشت و فرە لە حەشارگەیلی خاپوور کرد، وەلێ ئەو چووڵەوانی گەورە  ری وە داعش دەێد تا دووارە شوین و حەشارگەیل خوەی دروس بکەێد.