شەفەق نیوز - بەغداد
سەرچەوەیگ سیاسی ئاگادار، رووژ چوارشەممە، ئاشکرا کرد لەباوەت پەککەفتن ئەو دانوسەنینە کە لە ماوەی سەعاتەیل گوزەشتە لە ناوەین سەرکردەیل چوارچیوەی هەماهەنگی و کەتیبەیل حزبولڵا وەڕیەو چگ، وە بەشداری فەرماندەی فەیلەق قودس لە سوپای پاسدارەیل ئیرانی ئیسماعیل قائانی، لەباوەت قەیران جوڕف سەخەر (نەسڕ)، وە دووپاتکردن ئەوە کە گردەوبوینەیل هێمان نەڕەسینەسە ریککەفتنیگ کە کۆتایی وە ئاڵۆزییەگە بارێد لە ناوەین سەرۆک وەزیرەیل عەلی زەیدی و کەتیبەیل، وەرد نزیکەوبۊن کۆتاییهاتن مۆڵەتە حکومەتییەگە کە ئەرا ئیوارەی جمعەی ئایەندە دیاری کریاگە.
سەرچەوەگە ئەرا ئاژانس شەفەق نیوز وت، کە "ئەو گردەوبوین و پەیوەندییە خەسەیلە کە بەغداد لە ماوەی سەعاتەیل گوزەشتە وەخوەی دی، وە ئامادەبۊن قائانی و شمارەیگ لە سەرکردەیل گرووپە چەکدارەیل، کۆتایی هات وە خستنەڕۊ چەن پێشنیاریگ ئەرا چارەسەرکردن قەیران جوڕف سەخەر، وەلێ بڕیگیان رۊوەرۊ رەتکردن بۊن لەلایەن کەتیبەیل حزبولڵاوە، لە وەختیگ سەرۆک وەزیرەیل عەلی زەیدی پێشنیارەیل ترەک رەتەو کرد، ئەوەگ ریگری لە رەسین ئەرا ریککەفتنیگ کۆتایی کرد تا ئیسە".
دیاری کرد کە "زەیدی هێمان پابەندە وە هەڵوێستەگەی لەبان کشیانەوی کەتیبەیل حزبولڵا لە جوڕف سەخەر و رادەسکردن وەرپرسیارییەتیە ئەمنییەگەی ئەرا هێزە حکومەتییەیل، وە هەژمارکردن ئیوارەی جمعەی ئایەندە وە دۊایین وادە ئەرا جیوەجیکردن بڕیارەگە، وەبی داین هیچ دریژکردنیگ زیاتر".
سەرچەوەگە وتیش دا کە "ساعەتە کەمەیل ئایەندە یەکلاییکەر بوون لە دیاریکردن رێڕەو کۆتایی ئەرا قەیرانەگە، چ وە رەسین ئەرا چارەسەریگ سیاسی و ئەمنی کە گەرەنتی گواستنەوەی کۆنترۆڵ لەبان ناوچەگە بکەێد وە شیوەیگ ئاشتیانە، یا چگن وەرەو وژاردەی ئاڵۆزی سەربازی کە سەرۆک وەزیرەیل هەڕەشەی جیوەجیکردنی کەێد ئەرا چەسپانن دەسەڵات دەوڵەت".
ئی وەرەونواچگنەیلە دۊای زنجیرەیگ دیدار و ناوبژیوانی تیەێد کە قائانی بەشداری لەتیان کرد، کە ئیوارەی دووشەممە رەسیە عراق جۊر کلکریای لە ریبەر ئیرانی موجتەبا خامنەئیەو، لە تەقەلایگ ئەرا کۆنترۆڵکردن ناکۆکییە پەرەسەنەگە لە ناوەین حکومەت و کەتیبەیل حزبولڵا و ریگریکردن لە چگن وەرەو رۊوەرۊبۊنیگ چەکداری.