شەفەق نیوز - میسان

خاوەنەیل ماشینەیل بارهەڵگر و رانندەیل ماشینەیل کرا و کارکەرەیل لە دەروازەی سنووری شیب لە پارێزگای میسان، ئمڕوو شەممە، ناڕەزایەتی کردن لەبان ری وەرەو دەروازەگە، ئەرا داواکردن دووارە وازکردنی و رەسانن داواکارییەیلیان ئەرا حکومەت فیدراڵی لە بەغداد، دۊای وەردەوامبۊن بەساننی و پەککەفتن جویلەی کار لەناوی.

ناڕەزایەتییکەرەیل داواکارییەیل ئەرا دووارە کارکردن دەروازەگە بەرزەو کردن، وە دووپاتکردن ئەوە کە وەردەوامبۊن بەساننی زەرەد رەسانییە وە بەرژەوەندییەیل و سەرچەوەیل بژیوییان، لە سای پشتبەسین چینیگ فراوان لە رووڵەیل پارێزگاگە لەبان جویلەی گواستنەوە و بازرگانی و گەشتیارەیل لەڕی ئی مەرز سنوورییەو.

 حکومەت فیدراڵی، لە 20 تشرین یەکەم/ ئۆکتۆبەر ئیسە، فەرمان دەرکردۊد وە بەسانن مەرز سنووری شیب وەرد ئیران، کە کەفێدە خوەرهەڵات پارێزگای میسان، وەبی دیاریکردن سروشت هووکارەیلە یا وەختیگ ئەرا دووارە وازکردن دەروازەگە.

 لە ئاشکراکردنیگ دۊاتر، قسەکەر حکومەت، حەیدەر عەبوودی، وت کە وسانن کار لە دەروازەگە وە هووکار ئامادەنەۊن تەکنیکی و هونەری تیەێد، و وە ئامانج بەرزەوکردن ئاست ئامادەکارییە لۆجستییەیل و پەرەداین توانایەیل کارکردنی، وەگەرد وەردەوامبۊن هامشوو بازرگانی وەرد ئیران لەڕی دەروازە سنوورییەیل ترەک.