شەفەق نیوز/ سەرچەوەیگ ئەمنی لە پارێزگای زیقار، ئمڕوو سێشەممە، خەوەردا لە کوشتن یەکیگ لە هاووڵاتییەیل لە باشوور شار ناسریە، و هەمیش هێزیگ ئەمنی تەرمیگ نەناسریاگ لە باشوور بەغداد پایتەخت پەیا کرد.
سەرچەوەگە ئەرا ئاژانس شەفەق نیوز وت: چەکدارەیلیگ نەناسریاگ وە ماشینیگ پەلامار هاووڵاتییگ لە قەزای سوق شیوخ لە باشوور پارێزگاگە دان.
سەرچەوەگە دیاری کرد ک قوربانییەگە لەوەر پەلامارەگە زەخمدار بوی، و وەرەو خەسەخانە بریا، باوجی لەناو خەسەخانەگە گیانی لەدەسدا.
لە بەغداد پایتەخت، هێزیگ ئەمنی تەرم پیاویگ نەناسریاگ پەیا کرد، لە یەکیگ لە مەیدانەیل قەزای مەیدان فڕە دریاگە، و سەرچەوەگە وتیش؛ تەرمەگە وە چەقو دریاسە لی.