شەفەق نیوز/ محمد ئەهریس ئەندام ئەنجومەن پارێزگای نەینەوا، ئمڕوو شەممە، هوشداری دا لە وسیان کار لە پڕۆژەی ئاویاری جەزیرە، کە لە پڕۆژەیل ئاویاری ستراتیژی وڵاتەگە دریەێدە قەڵەم، ئەوەیش لەوەر داوەزیان بڕەیل تەکان ئاو لە دەریاچەی بەنداو موسڵ.
ئەهریس ئەرا ئاژانس شەفەق نیوز وت: دەریاچەی بەنداو موسڵ بنەمای ئاو ستراتیژیە ئەرا پارێزگای نەینەوا و گشت عراق، کە ئاو دەێدە پڕۆژەی ئاویاری جەزیرە، کە زیاتر لە ٢٤٠ هەزار دزنم لە زەوی کشتوکاڵی ئاویاری کەێد، کە گەنم و جویە و پەتاتە و تەماتە و بەرەفتاو و بەرهەمەیلیگ ترەک لەناوی کاڵیەن.
وتیش: پڕۆژەی ئاویاری جەزیرە کە وە گرنگترین پڕۆژەیل ئاویاری لە عراق دانریەێد، ئەوەسا وەی نزیکە پەکی کەفێد، لەوەر هشکەساڵی و کەمی واران و کەمی تەکان ئاو لەلایەن تورکیا، و لەوە گرنگتر زیایبوین تەکان ئاو لە دەریاچەی موسڵەو، و دیاری کرد کە بڕەیل ئاو لەلای تورکیا وە ١٧٠ مەتر شەشپاڵوو لە چرکەیگ مەزەنە کریەێد، لە وەختیگ ئەو ئاوە کە لە دەریاچەی بەنداو موسڵەو خەرج بوود لە ٥٠٠ مەتر شەشپاڵوو لە چرکەیگ زیاترە.
وتیش: داوەزیان ئاو لە دەریاچەی بەنداوەگە هەڕەشەی وسیان کار لە پڕۆژەی ئاویاری جەزیرە دەێد، ئمجا زەرەد وە رووبەرەیل فراوانیگ لە زەویلەیل کشتوکاڵی رەسنێد، هەمیش زەرەد وە شمارەی گەورەیگ لەو خیزانەیلە رەسنێد کە کار کشتوکاڵی کەن لە ناوچەیلە.
ئەهریس داوا لە دەسەڵاتەیل پەیوەندیدار کرد ریکارەیل زویوەزوی جیوەجی بکەن ئەرا مسۆگەرکردن وەردەوامی کار لە پڕۆژەی ئاویاری جەزیرە و وەدویانەچگن ئاست ئاو لە دەریاچەی بەنداوەگە ئەرا مسۆگەرکردن نەوسیان کار لە گرنگترین پڕۆژەیل ئاویاری لە عراق.
بەنداو موسڵ کە لە ساڵ ١٩٥٠ دروس کریاس، وە گەورەترین بەنداوەیل عراق دانریەێد، و لە پلەی چوارەم تیەێد لە گەورەترین بەنداوەیل خوەرهەڵات ناوڕاس.