شەفەق نیوز/ نێچیرڤان بارزانی سەرۆک هەرێم کوردستان، ئمڕوو چوارشەممە، دووپاتکرد لەبان گامەگان ئەرا بتەوکردن کارەیل هاوبەش لەناوبەین حکومەت هەرێم وحکومەت فیدڕاڵی، و جەختکرد ک کوردەگان شانازی وە عراقیبوین خوەیان کەن، و رک وەردەوامی کارکردن دیرن ئەرا ئارامی و ئەمن و سەروەری عراق . ئەویش لە چەوپیکەفتنەیگەی لەبەغداد هات وەگەرد موستەفا کازمی سەرۆک وەزیران. نووسینگەی کازمی لە بەیاننامەیگ وت: لە چەوپیکەفتنەگە باس لە باوەتە گرنگەگان کریا ک پاڵپشتی یەکتەواوکردن وهاوکاری کەێد لەناوبەین دامەزراوەگان دەوڵەتەگە لە هەردوگ حکومەت فیدڕاڵ وهەرێم، لە چوارچیوەی بنەماگان وکارەگە ک دەستور نشانی داگە. وتیش؛ هەمیش باس تەقەلا نیشتمانیەگان کریا دژوە پەتای کۆڕۆنا، وهەمیش رەنجە وەردەوامەگان و هەماهەنگی دژوە شانە خەفتگەیل داعش، و وەشوونکەفتن جیماگەیل تیرۆر ک شوونیگ ئەرایان نیە لەبان خاک عراق. کازمی دووپاتکرد لە گرنگی دەور پاسەوان هەرێم لە پێشمەرگە جوور بەش تەواوکەریگ لە سیستمە ئەمنیەگەی عراق. لەلای خوەییش بارزانی دووپاتکرد لە شانازی هەرێم کوردستان وە ئەو دەورە ک لەعراق دەسکردەپی وە نوێنەرایەتیی لە جینە هەرێمی وناودەوڵەتیەگان، و لەرووشنایی رەوشە سیاسی وئەمنیەگان، وگەشەکردن رەوش تەندروسی، وکاریگەریەگانی لە دۆخ ئابووری لە وڵاتەگە. هەمیش دیدارەگە وەگورەی بەیاننامەیگ رەسیە ئاژانس شەفەق نیوز باس لە خشتەی کارەیل ئەنجومەن نوینەران کرد، و یاساداینە گرنگەگان ک لە ماوەی ئایندە گرنگن، لەلیان یاسای هەڵبژاردن ئەنجومەن نوێنەران، ک وەرجەیە ئەنجومەنەگە دەنگ لەبانی دا، و یەکلاکردنەووەی باوەت بازنە هەڵبژاردنەگان، وخاسەوکردن یاسای دادگای فیدڕاڵی باڵا، و یاسایلیگ تر. دیدارەگە دووپاتکرد لە گرنگی وەردەوامبوین دانووستانەگان و چارەسەرکردن باوەتە گیرهاتگەگان وەگورەی دەستور، وکارکردن ئەرا بەرزەوکردن بەرژەوەنی باڵای نیشتمانی، وهەماهەنگی ئەرا وەپشتسەرنان قەیرانەگان، و خاسەوکردن رەوش وڵاتەگە.