شەفەق نیوز - نەجەف / مەیسان

دادگای تاوانەیل نەجەف، ئمڕوو چوارشەممە، سزای لەسێدارەدان  دەرکرد لەبان تاوانباریگ کە  کوڕ خاڵوو خوەی وە گولە کوشتیە.

سەرچەوەیگ دادوەری ئەرا ئاژانس شەفەق نیوز وت:  رویداوەگە لە ناوەڕاس شار نەجەف لە ساڵ 2025 روی دا.

دیاریکرد،  بڕیارەگە وەپای سزایەیل ماددەی 406 لە یاسای سزادان عراقی شمارە 111 ساڵ 1969، تایوەت وە تاوان کوشتن وە مەبەست دەرچگە.

لە میسان، دادگای تاوانەیل سزای زیندانیکردن هەمیشەیی دەرکرد ئەرا دوو تاوانبار لەبان تاوان بازرگانیکردن وە ماددە هوشبەرەیل.

و وەپای بەیاننامەیگ دەرچگ لە ئەنجومەن دادوەری باڵا، کە رەسیە ئاژانس شەفەق نیوز، 12 کیس ماددەی هووشبەر کریستال وەلایەن تاوانبارەیلەو دەسوەبانیان گیریاس، کە کێش گشتیان رەسیە یەک کیلوگرام، وە مەبەست بازرگانیکردن و فرووشتنی لەناوەین وەکارهاوەرەیل.

بەیاننامەگە ئاشکراکرد، بڕیارەگە لەبان ئەوانەگ دەرچگ وەپای سزایەیل ماددەی 27/ یەکەم لە یاسای هوشبەرەیل و کاریگەرەیل عەقڵی شمارە 50 ساڵ 2017ە.