شەفەق نیوز- بەغداد

دادگای تاوانەیل کەرخ، رووژ سێشەممە، بڕیاریگ وە زیندانیکردن ئەرا ماوەی 6 ساڵ لەبان پەنج تاوانبار ژن وە تاوان بازرگانیکردن وە مرۆڤ دەرکرد.

وەپای بەیاننامەیگ کە لە ئەنجومەن دادوەری عراقی کە رەسیەسە ئاژانس شەفەق نیوز، تاوانبارەگە (داڵگ) وە هاوبەشی وەگەرد چوار ژن مناڵە کوورپەگەی وەرانوەر بڕ سێ ملیۆن دینار عراقی فرووشتگە.

وەپای بەیاننامەگە، بڕیارەگە لەبانیان پشت وە فەرمان مادەی 6 / یەکەم و پەنجەم لە یاسای دژایەتی بازرگانیکردن وە مرۆڤ شمارە 28 ئەرا ساڵ 2012، و وە بەڵگەی مادەیل بەشداریکردن 47 و 48 و 49، و وە پشتبەسین وە فەرمان مادەی 132 / 2 لە یاسای سزایەیل دەرچگە.