شەفەق نیوز/ سەرچەوەیگ پزشکی، ئمڕوو سێشەممە، خەوەر لە مردن ئەو پیاوە دا ک ژنەکەی لە پارێزگای زیقار لەوەر هاوردن دوویەم ژن لەبانی ئاگری دا.

سەرچەوەگە ئەرا ئاژانس شەفەق نیوز وت: پیاوەگە لەوەر سوزمانەیلی لەوەخت ئاگردان ئەو ژوورە ک لەناوی بوی گیانی لەدەسدا.

سەرچەوەیگ چەودیر لە پارێزگای زیقار، رووژ جمعەی گوزەیشتە، ئاشکرای ووردەکاریەیل تاوان دڵتەزنیگ کرد ک ژنیگ لەناوڕاس شار ناسریە وە شویەگەی خوەی کرد.

سەرچەوەگە ئەرا ئاژانس شەفەق نیوز وت: ژنیگ ئاگر شویەگەی لە وەخت خەفتنیان لەناو ژوورەگەیان دا، هەنای پڕ ناوی وە بەنزین کرد و ئاگری دا، و دەر ژوورەگە بەسا تا لەمەوقەیگ ک لەخەو هەڵسێد نەواێد، وتیش؛ هەنای پیاوەگە هاتە خەوەر تەقەلا دا لە ژوورەگە بواێد، وەلی وەپی نەکریا، و لەناو یەخچاڵەگە خوەی شاردەو تا ئاگرەگە وە تەواوەتی سزانەی.

سەرچەوەگە دیاری کرد ک پیاوەگە ئەرا خەسەخانە بریا تا چارەسەری وەربگرێد باوجی ئاست سزاننی فرە بوی تا ئیجا هەواڵەی ناوچەی ئەهواز لە ئیران بکەن، و لە مەترسی دەرچگ.

سەرچەوەگە باس کرد ک ژنەگە لەوەر ئەوە ک قوربانیەکە ژنیگ تر لەبانی هاوردگە ئی تاوان دڵتەزنە وە شویەگەی کرد چوونکە تا 14 ساڵ هاوسەر بوینە و مناڵ ئەرای نەهاوردگە.