شەفەق نیوز/ هەماهەنگکار باوەتەیل خوەرهەڵات ناوڕاس لە ئەنجومەن ئاسایش نەتەوەیی ئەمریکی بریت ماکۆرگ، ئمڕوو دووشەممە، دووپات کرد ک ئەوەسا ئەمریکا لە پاڵپشتیکردن عراق و هەرێم کوردستان وەردەوام بوود، و هەولێر و بەغداد تۊەنن ئەرا لەناوبردن داعش پشت وە واشینگتۆن بوەسن.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان لە هەولێر پیشوازی لە ماکرۆگ کرد، و باس سەردانی ئەرا عراق و هەرێم کوردستان وە گرنگ کرد، و دووپات کرد ک لەو مەوقەگ ئەمریکا دیرێد ئەرکەیل هێزەیلی و هاوپەیمان ناودەڵەتی ئاڵشت کەێد، دووپاتکردن لە پابەندیی وە پاڵپشتیکردن عراق و هەرێم کوردستان پەیام گرنگیگە.
بەیاننامەگە وتیش: لە کۆبونەوەگە ک وە ئامادەبۊن باڵیۆز ئەمریکا لەلای عراق و قونسڵ گشتی ئەمریکا لە هەولێر وەڕیەو چگ باس چەن باوەتیگ کریا، جۊر هەڵبژاردنەگە و ئەنجامەیلی و مەزەنەی ئایندەی کاروبار سیاسی لە عراق و گفتوگۆکردن ناوبەین لایەنەیل عراقی و تەقەلایل دروسکردن حکومەت فیدراڵی نوو و رەوشەیل ئەمنی و سەربازی و ئابووری وڵاتەگە، و پەلامارەیل داعش و هەماهەنگی ناوبەین پێشمەرگە و سوپا و پەیوەندی هەولێر و بەغداد و گفتوگۆکردن ستراتیژی عراق وئەمریکا و دەرفەتەیل ئەوزەڵکردن پەیوەندیەیل ناوبەین هەردوگلا کریا.
بەیاننامەگە وتیش: هەردوگ لایەنەگە یەکڕا بۊین ک داعش مەترسی راسییگە و هیمان عراق وەردەوامی پاڵپشتیکردن هاوپەیمان ناودەڵەتی ئەرا نواگردنی و شکستهاوردنی خوازێد، و دیاری کرد ک هاوکاری و هەماهەنگی ناوبەین هێز و لایەنە عراقیەیلە گرنگە تا بتۊیەنن حکومەتیگ گشتگیر لە وڵاتەگە دروس بکەن، و داوای عراقیەیلە وەجی بارێد و مقەیەتی ئاسایش و ئارامی بکەێد.
بەیاننامەگە دیاری کرد ک رەوشەیل ناوخۆیی هەرێم کوردستان و پەیوەندی ناوبەین عراق و دەوڵەتەیل ناوچەگە و جەهان و دۊیاترین گەشەیل سوریا و باوەت کورد لەناوی و چەن باوەتیگ گرنگ لە کۆبونەوەگە باس کریا.