شەفەق نیوز/ بەغدا

سەرچەوەیگ ئاگادار، ئمڕوو دوشەممە، راگەیان  سەرکردەیل چوارچیوەی هەماهەنگی گردەوبوینیگ وە ئامادەبوین سەرۆک حکومەت و وەزیر دارایی ساز کەن، ئەرا گفتوگوکردن لە دەنگدان لەبان تەواوکردن کابینەی حکومەت و بودجەی ساڵ ئاینده.

سەرچەوەگە ئەرا ئاژانس شەفەق نیوز دیاری کرد، "سەرکردەیل چوارچیوەی هەماهەنگی ئیوارەی ئمڕوو، گردەوبوینیگ وە ئامادەبوین سەرۆک وەزیرەیل عەلی زەیدی ساز کەن ئەرا باسکردن لە تەواوکردن دۆسیەی هیرهاوردن چەک وەدەس دەوڵەت، و تەواوکردن کابینەی وەزارەت و دەنگدان  لە کۆتایی ئی هەفتە یا سەرەتای هەفتەی ئاینده".

وتیش "گردەوبوینەگە میوانداری وەزیر دارایی فالح ساری وەخوەیەو دوینێد ئەرا باسکردن لە پڕۆژەیاسای بودجەی 2027 و دۆسیەیل دارایی و ئابووری پەیوەنیدار وەپای ئەوەگ رەهەند رامیاری دیرن".

چوارچیوەی هەماهەنگی، لە گردەوبوینیگ دەسوەجی لە شەو جمعەی گوزەشتە، دووپات کرد کە 30 حوزەیران/ ئۆکتۆبەر 2027 وەخت کۆتایی رێککەفتن کریاس لەبانی ئەرا جیوەجیکردن مادەی دەستووری تایبەت وە چارەسەرکردن پرس چەک، و داوا لە گشت لایەنەیل کرد پابەنبوون وە ئارامییگ گشتگیر.

سەرچەوەگە ئەرا ئاژانس شەفەق نیوز ئاشکرا کرد  هاوپەیمان دەوڵەت یاسا وە سەرۆکایەتی نوری مالیکی وە شیوەی فەرمی یاسر صخێل ئەرا پۆست وەزارەت ناوخوەی، و حەیدەر بەهاء کە ئیرنگە راگر کۆلێژ دەرمانسازییە لە زانکۆی نەهرێن ئەرا پۆست وەزارەت خوەنین باڵا کاندید کردیە.