شەفەق نیوز/ مەسعود بارزانی سەرکردەی کورد و سەرۆک پارت دیموکرات کوردستان، ئمڕوو پەنجشەممە، پەیام پێروزبایی ئەرا موسەڵمانەیل هەرێم کوردستان و عراق و جهان ئەڕاستەکرد وەبۆنی جەژن قوربان.
بارزانی لە پەیامەگەی ک پێروزبایی لە خاوەن شەهیدەیل هێز پێشمەرگە کرد، وت: لەی وەختە ک پێشوازی لە جەژن قوربان کەێمن، کەفیمنە وەر سەختیەیلیگ سیاسی و ئابووری و تەندروسی گەورایگ، و ئەو سەختیەیلە بوینە سەرچەوەیگ ئەرا گرفت و نائارامی سیاسی، ک رەوش ژیان وگوزران گەل کوردستان کەێدە ئامانج.
وتیش: ئەرا وەپشتسەرنان ئەو سەختیەیلە و رەوشە سەختەگان، بایەسە گشتمان وە هەست برایەتی وهاوبەشی کار بەکەیمن، و هان گامەیل بەیمن لە بتەو کردن هویر پێکەوەژیان.
بارزانی باس سوپاسکردن خوەی ئەرا خۆڕاگری گەل کوردستان کرد، ک سەختیەگان لە گشت قۆناغەگان هەڵگرد، و وت؛ دەرفەت جەژن قوربان وەدەس تێرم تا بانگەواز ئەرا گشت لایەنە سیاسیەگان کوردستان بکه‌م ئەرا چارەسەرکردن و وەپشتسەرناین گرفتەیل وەگەرد یەکەو لە چوارچیوەی بەرژەوەنیە باڵاگان کوردستان.
وتیش: هەمیشە کەفێدە یادمان ک وەیەکرێزی گرفتەگان وە شیوەیگ خاستر چارەسەری کەیمن، لەسای هاوبەشی و یه‌کێتی ریزەگە دەسکەفتەیل گەورایگ ئەرا گەلەگەمان وه‌ده‌س هات. وەگشت دڵنیاییگەو ئەیە چەوەڕی کریاگ گەڵ کوردستانە لە لایەنە سیاسیەگان، ئەراوە داوا لە گشت لایەنەگان کەم له ئاست چەوەڕیکریاگ گەلەگەمان بوون، و لەخود وەختەگە چەودیری لە کەلتور پایەبەرز و دەوڵەمەن کورد بکەن، و دویرەو بکەفن لە وتارە توند و کاریگەری دارەگان ک وەرانوەر یەک نەگونجیانە.