سەرچەوەگە ئەرا ئاژانس شەفەق نیوز وت: کوڕ تاوانکار (جەعفەر یاسری) ک پیرەکە جمعە وە ئۆپراسیۆنیگ کوشیا، تەقە لە بڕیگ کەس لە گەڕەک قاهیرە ناوڕاس شار عمارە کرد، بویە هوکار کوشیان کەسیگ و زەخمداری سێ کەس، یەکیگیان کوڕ گەورەی هووز ئال زێرجە لە عمارە. 

 دیاری کرد ک تاوانکارەگە وەرەو شوین نادیاریگ وایە، و دەزگایل ئەمنی ناخڵەی ئەو ناوە دان، و تەرمەگە ئەرا پزشک دادوەری بردن، و زەخمدارەیل ئەرا نزیکترین بنکەی تەندروسی.

سەرچەوەگە وتیش: توڵەسەنین هووزانە ناوبەین جەعفەر یاسری و هووز ئال زێرجە بویە، و کوڕ یاسری توومەتبار قوربانیەیل کەێد ک دەسیان وەگەرد لایەنەیل ئەمنی بویە لە کوشتن باوگی.

وەرجەیە، پیرەکە جمعە، سەرچەوەیگ ئەمنی ئەرا ئاژانس شەفەق نیوز وت: هیزیگ سەربازی گەورەیگ لە ئۆپەراسیۆنەیل میسان، مەوقەی شەفەق، لە ناوچەی خەمسە کێلو لە قەزای مەیموونە، تەقە وەرانەوەر سەید جەعفەر کردن ک خوەی و دووان لە گرووپەگەی کوشیان، و یەک سەرباز زەخمدار بوی.

سەرچەوەگە دیاری کرد ک ئی کار دویاییە دویای چەن تەقەلایگ وەرجەیە هات نەڕەسیە گردن تاوانکارەگە، ک وەناوبانگترین سەرۆک باند لە میسان دانریەێد، هەمیش وەپویل خەڵک کوشێد و کاریش لە مادەی هوشبەری کەێد، و چەن کاریگ تاڵانکردن جیوەجی کردیە.