شەفەق نیوز/ زیاتر لە ١٣ مەلیۆن شاگرد و خوەنەوار لە عراق، شەوەکی ئمڕوو چوارشەممە، روی وەرەو مەکتەوەیلیان کردن، وە دەسکردن ساڵ خوەنستن نوو ٢٠٢٢ – ٢٠٢٣، بیجگە هەرێم کوردستان ک لە ناوڕاس مانگ ئەیلوول گوزەشتە دەسکردە دەوام.
وەزارەت پەروەردەی فیدراڵی ئویشێد: شمارەی خوەنەوارەیل رەسیە زیاتر لە ١٢ خوەنوار، و شمارەی شاگردەیل یەک سەرەتایی رەسیە یەک مەلیۆن و ٢٠٠ هەزار.
لە بەیاننامەیگ لەلایەن وەزارەت پەروەردە ک رەسیە ئاژانس شەفەق نیوز لە زوان عەلی حەمەساڵح وەزیری وت: ئمڕوو تەنیا ویستگەیگ پەروەردەیی نییە ئەرا تەواوکردن ری هوکارەکردن، باوجی پەیمان وپابەندی رەوشتی ومرۆییە، ئەرا نووکردن لایەنگری عراق، و جەخت لەبان کار جددی و بەرهەمدار کرد ئەرا وەردەوامی وەخشین وبیناکردن خود و مەغزەیل.
هەمیش وت: لە ماوەی ساڵەیل گوزەشتە دەسکەفتەیل پەروەردەیی فرەیگ وەدەس هاوردیمن، و سیستەم هوکارەکردن و دامودەزگایلی ئامادەیی تەواویگ وەرگردن، وەو کەرەستەیل زانستی و ئەزموونەیل کەڵەکەبویە.
ئمڕوو چوارشەممە دوانزەی تەشرین یەکەم، مەوقەی دیاریکراگ وەزارەت پەروەردەس ئەرا گلەوخواردن هوکارەکردن ئیداری وەشیوەیگ تەواوی و ئەرا گشت قوناغەیل، دویای هەڵگردن قەیەغەیل پەتای کۆرۆنا لە عراق.
هەمیشە لە یەک تەشرین یەکەم دەسوە ساڵ خوەنستن نوو کریاد، باوجی ئەو رووژە کەفتە ساڵیاد ناڕەزاییەیل تەشرین، ک هیشت وەزارەت پەروەردە مەوقەی دەسکردن وە دەوامەگەی بخەێدە دویا.
ئی ساڵ خوەنستن نووە، جیاوازی وەرچەویگ نشان دەێد، ک خوەنوار و شاگردەیل کتاو نەیرن، ک وەزارەت پەروەدە قەیرانیگ لە دابینکردن کتاو وەخوەی دوینێد، ک هەڕەشەی بەدییگ لە ئاست خوەنەواری عراق دەێد.
سەرچەوەیگ وەرپرس لە وەزارەت پەروەردەی عراق، ئەرا ئاژانس شەفەق نیوز ئویشێد: ئمساڵ کتاوەیل چاپ نەکریانە، و ئەوەسا وە شیوەیگ تەواوی پشت وەو کتاوەیلە بەسیەێد ک پار وپیرار لە خوەنەوارەیل گلەو دریانە، ئەوەیش لەوەر بڕیار بوودجەگە.