شەفەق نیوز/ سەرچەوەیگ ئەمنی لە پارێزگای زیقار، ئمڕوو یەکشەممە، خەوەردا مەرافە لەناوەین دوو لایەن دروسبویە وە سەربڕین یەکیگیان وە دەس ئەوەکە کۆتایی وەپی هاتیە لە دەوروگەرد قەزای شەترە باکوور پارێزگاگە کەفێدە باشوور عراق.
سەرچەوەگە وە ئاژانس شەفەق نیوز وت، هووکار ئەنجامداین تاوانەگە ئەوەسە هەردووگ لا سەرخوەش بوینە، مەرافەیگ لەناوەینیان دروسبویە وە ئەنجامدان تاوانیگ رخبەر کۆتایی هاتیە، و تاوانبار ئەرا شوینیگ نادیار وایە.
سەرچەوەیگ ئەمنیش لە سەڵاحەدین خەوەردا هێزەیل پۆلیس دویەتیگ بیس ساڵان قورتارکردن کە تەقەلای خوەیکوشتن دا لەبان پیەڵ لە شار تکریت، لەهەمان وەخت تەرم گەنجیگ دراوردن کە ماوەی هەفتەیگە لەناو چەم دیجلە باکوور پارێزگاگە خنکیایە.
سەرچەوەگە وە ئاژانس شەفەق نیوز وت، پۆلیس فریاکەفتن خەوردارکریاس دویەتیگ بیس ساڵان لەلای پیل نزیک زانکۆی تکریت وسیایە و تەقەلای وەخوەرخستن خوەی دەێد.
وتیش، پۆلیس توەنستیە وە وەختیگ پەیمانەیی بڕەسێد و دویەتەگە رازی بکەێد واز لە خوەکوشتن بارێد، ئرەرا لێکۆڵینەوە لە هووکار تەقەلای خوەیکوشتنەگەی کلکریاسە بنکەی پۆلیس.
لە لایگ ترەک سەرچەوەیگ لە هێزەیل پۆلیس دەیاوای توەستن تەرم گەنجیک پەیابکەن کە لە چەم دیجلە تاسیاگە لە قەزای شرقات باکوور پارێزگاگە، لە دویای هەفتەیگ وەردەوام بوین لەمینەکردنی.
وتیش، پۆلیس تەرمەگە ئەرا پزیشک دادوەری کلکردیە دویای رادەس کەسوکاری کرێد، دیاریکرد، لایەنەیل پەیوەنیدار لێکۆڵینەوە لە رویداوەگە وازکردنە.