شەفەق نیوز- کەرکووک

فەریق روکن خانەنشین عەبد موتڵەگ جبووری، ئمڕوو یەکشەممە، لە تەمەن 86 ساڵان دۊای ململانییگ وەگەرد نەخوەشی کوچ دۊایی کرد، وەپای ئەوەگ سەرچەوەیگ پزیشکی خەوەر داگە.

 سەرچەوەگە لە لێدوانیگ ئەرا ئاژانس شەفەق نیوز وت، کە کوچکردگ لە ماوەی گوزەشتە تۊش بیمارییگ هاتۊد، وەرجە ئەوەگ رەوش تەندروسیی داوەزێد و ژیان وەجی ییلێد.

 جبووری لە ساڵ 1940 لە ئاوای ماحووز سەروە قەزای حەویجە لە پارێزگای کەرکووک لەداڵگبۊە، و لەناوی گەورە بۊە تا خوەنستن سەرەتایی و ئامادەیی تەواو کرد، تا بچوودە ناو کۆلێژ سەربازی لە بەغداد و وە پلەی مولازم لەلی دەرچگ، و دۊاتر بڕوانامەی روکن لە کۆلێژ روکن وەدەس هاورد تا بەرزەو بوود ئەرا پلەی نەقیب روکن.

 جبووری چۊ یاوەر ئەرا سەرۆک عراقی وەرین ئەحمەد حەسەن بەکر تا ساڵ 1979 دامەزریا، تا دۊای ئەوە وەردەوام بوود لە خزمەتکردن دامەزراوەی سەربازی چۊ فەرماندەی یەکەیگ، و لە جەنگ عراقی ئیرانی (1980 - 1988) دەرکەفت وەجۊریگ کە چەن مەدالیا و نیشانەیگ ئازایەتی وەدەس هاورد.

 لە ساڵ 1993، جبووری دەسگیر کریا و وە پلەی لیوا روکن بۊ وە فەرمان سەدام حسێن لەبان ئەوەگ کە ئەو وەختە وە "بزووتنەوەی ئەفسەرەیل جبوور" نریادە ناو، کە ئەرا ماوەی پەنج ساڵ و مانگیگ خریا ناو زیندان دۊای دادگاییکردنیگ رووکەش کە دەیەها لە رووڵەیل هووزەگەی گردە خوەی ناوەین لەسێدارەداین و زیندانیکردن و دەرکردن.

 دۊای ساڵ 2003، جبووری چگە ناو پرۆسەی سیاسی و بەرزەو بۊ ئەرا پلەی فەریق روکن، دۊاتر کورسییگ لەناو ئەنجومەن نوێنەرەیل عراقی لە پارێزگای کەرکووک لەناو بەرەی تەوافوق عراقی وەدەس هاورد، و پۆست جیگر سەرۆک وەزیرەیل لە ساڵ 2005 لە حکومەت ئیبراهیم جەعفەری گردە دەس، وەرجە ئەوەگ خانەنشین بکریەێد و خوەی تەرخان بکەێد ئەرا نۊسانن و بەڵگەدارکردن ژیاننامەی خوەی.

جی باسە کە کوچکردگ بڕوانامەی ماجستێر لە زانستەیل سەربازی، و بەکالۆریۆس لە یاسا و سیاسەت لە زانکۆی بەغداد وەدەس هاوردۊد.