شه‌فه‌ق نيوز/ جاريگتر له‌نوو روێ وه‌ڕوێ بوينه‌وه له‌ناونى خوه‌ينيشانده‌ره‌يل و هيزه‌يل ئه‌منى له شار ناسريه‌ى ناوه‌ند پاريزگاى زيقار له باشوور عراق روێدا, ئه‌ويش له‌چوارچيوه‌ى به‌رزه‌وبوين ئاست گرژيه‌يل له وڵاته‌كه.
له‌وباوه‌ته‌و، چالاكوانه‌يل و شايه‌تحاڵه‌يل ئه‌را شه‌فه‌ق نيوز وتن: هيزه‌يل ئه‌منى له ناسريه جاريگتر ده‌سكردنه‌سه ته‌قه‌كردن و وه‌شانن غاز ئه‌سرڕشن وه‌ره‌و روێ خوه‌ينيشانده‌ره‌يل دوياى ئه‌وه‌گ شماره‌يگ له‌ليان له پيه‌ڵ ئه‌لنه‌سر په‌ڕينه‌سه‌و.
ئه‌و چالاكوان و شايه‌تحاڵه‌يله يه‌يش دره‌خستن ك روێ وه‌ڕوێ بونه‌وه‌ى له‌ناونى هيزه‌يل ئه‌منى و خوه‌ينيشانده‌ره‌يل له فلكه‌ى سه‌ماوه له‌ناسريه روێداگه‌و باس له‌وه‌يش كرد زويتريش خوه‌ينيشانده‌ره‌يل تويه‌نستنه بڕه‌سنه باره‌گاى سه‌ركردايه‌تى پۆليس زيقار و خوه‌ينيشانداينيگ له‌ورا ريكبخه‌ن.