شه‌فه‌ق نيوز/ سه‌رچه‌وه‌يگ وه‌رپرس ئه‌منى، باس له كوشيان سه‌ربازيگ و زه‌خمداربوين سێ كه‌س تر كرد، له‌ناونيان ئه‌فسه‌ريگ له ئه‌نجام ته‌قينه‌وه‌ى مينيگ له باكوور پاريزگاى دياله.
سه‌رچه‌وه‌گه ئه‌را شه‌فه‌ق نيوز وت: سه‌ربازيگ وه قه‌ناس داعش له ره‌بايه‌يگ كوشياگه ك هيزه‌يل سوپا له فه‌وج 3 له ليواى 20 له ده‌ورگرد ناحيه‌ى جه‌له‌ولا گرته‌سه ئامانج و ئه‌فسه‌ريگيش له سوپا زه‌خمدار بويه وه‌ل دووان له پاسه‌وانه‌يلى له په‌لاماريگ له‌ڕێ مينيگ له‌چاڵنرياى ك سه‌ياره هه‌مه‌ره‌گه‌يان گرته‌سه ئامانج له ده‌ورگرد ناحيه‌ى جه‌له‌ولا وه دويرى 70كم له باكوور باقوبه.
جى باسه، ناوچه‌يل باكوور جه‌له‌ولا بشيوييگ ئه‌منى وه‌پيه‌و دياره ئه‌را زياتر له ساڵيگه، ئه‌ويش دوياى دزه‌كردن تيرۆرسته‌يل داعش ئه‌را ناوچه‌گه و هاتنيان له شوونه‌يل تره‌و ئه‌را ناو باخ و بووسانه‌يل كشتوكاڵى.