شەفەق نيوز/ دەسەی کەشناسی و زەویلەرزەناسی عراق وت: ئەو کەشوهەوای ناجیگیرە کە ناوچە و شارەیل وڵات لەی رووژەیل دویاییە داگیر کرد، ئمڕوو سێشەممە تەواو بوود، و وەگەرد داوەزیان پلەی گەرمی، ئەرا سروشت خوەی گلەو خوەێد.
سادق عەتیە لە بەش مەزەنەکردن کەشوهەوا لە دەسەگە لە پۆستیگ وت: پەردە لەبان ئەو کەشوهەوا داگریا کە وەگەردمان بوی، و کاریگەریی تەواو بوی، تا کەشوهەوا کپەو بوود.
وتیش: وەگەرد ئەوەیش، هیمان بەشیگ لە ناوچەیل باکوور وڵات هانە ژیر کاریگەری جیماگەی ئەورە وارانیەی، وەگەرد جیماگەی ئەو خوەڵوتووزە لە باکوور خوەرهەڵات و باشوور وڵات کە دویەکە وڵاتەگە داگیر کرد، و مەزەنە کریەێد کەمەکم نەمینێد.
عەتیە وتیش: هەمیش مەزەنە کریەێد ئمڕوو کەمیگ خوەڵوتووز لە ناوچەیلیگ جیاجیا گورج بوود، لە ئەنجام وای باکووری خوەرئاوایی.
پسپۆڕ کەشناسی ئەرا مەردم وت: دڵنیا بوون و بچنە دەیشت، ئەو کەشوهەوا تەواو بوی، و کەمکەم ئەرا سروشت خوەی گلەو خوەێد، وەگەرد داوەزیان پلەی گەرمی.