شەفەق نیوز/ سەرچەوەیگ ئەمنی لە واست، ئمڕوو پەنجشەممە، خەوەردا لە زەخمداریبوین پەنج مەدەنی وە رویداویگ هاتوچو لە باکوور پارێزگاگە، دووانیان زەخمیان سەختە، و هەمیش پەنج کەستر وە رویداویگ هاتوچو لە ئەنبار زەخمدار بوین. 

یەکیگ لە سەرچەوەیل ئەرا ئاژانس شەفەق نیوز وت: رویداویگ هاتوچو لەبان ری واست-بەغداد، نزیک ناحیەی دبونی، بویە هووکار زەخمداری پەنج کەس، دووانیان زەخمیان سەختەو وگشتیان ئەرا خەسخانەی نزیکیک بڕیان. 

ئەو سەرچەوەگە هەمیش وت: وە رویداویگ هاتوچو لەبان ری هیت-بەغدادی لە پارێزگای ئەنبار کەفتە ناوبەین ماشینیگ سەربازی و ماشینیگ مەدەنی، پەنج کەس زەخمدار بوین، و گشت زەخمدارەیل رەسینە خەسخانە.