شەفەق نیوز - بەغداد

مستەفا جەبار سەنەد، وەزیر پەیوەندییەیل عراقی، ئمڕوو شەممە، رەت کرد کە وەزارەتەگە وە شیوەیگ راسەوخۆ وەگەرد کۆمپانیای "ستارلینک" ئەمریکی ئەرا خزمەتگوزاری ئینتەرنێت ئیمزا کردۊد، و دووپات کرد لەبان وەردەوامبۊن کۆمپانیای "ئێرسلینک" لە کارکردن ئیسە لە وڵاتەگە.

یەیش لە میوانداریکردنی هات لە دانیشتنیگ باسکردن لە پەراویز کارەیل کۆنگرەی "گفتوگۆی بەغداد هەشتەم"، کە پەیمانگای عراقی ئەرا گفتوگۆ رێکی خەێد.

 سەنەد لە دانیشتنەگە وت، کە وەزارەت پەیوەندییەیل تەقەلا دەێد بەرهەمهاوردن ململانێ ناونی کۆمپانیاگەیل بکەێد ئەرا وەرەونوابردن کەرت پەیوەندییەیل لە وڵاتەگە.

 هەمیش وت: وە شیوەیگ راسەوخۆ چۊ وەزارەت پەیوەندییەیل وەگەرد "ستارلینک" ئیمزا نەکردیمنە، و دیاری کرد: هاوبەش ئیسەمان "ئێرسلینک" و لایەنەیل ترەکە، و دۊای دوو ساڵ "ستارلینک" بوودە هاوبەشمان.

لەلای خوەییشەو سەرۆک دەسەی راگەیانن و پەیوەندییەیل بەلیغ ئەبو کەلەل لەناو میوانداریکردنی لە خود دانیشتن، وت کە 40 هەزار ئامێر نایاسایی وەرجە ئیمزاکردن وەگەرد "ستارلینک" لە عراق بۊە، و دووپات کرد کە 160 وڵات لە دەورگرد جەهان خزمەتگوزارییەیل "ستارلینک" وەکار تیەرن.

 هەمیش وت "لیستیگ  ئەمنی دانایمنە و "ستارلینک" بۊە یەکەمین کۆمپانیای جەهانی کە مل وە یاسای عراقی بەێد"، و دووپات کرد کە "گشت ئەو هۊردەکارییە هۊردەیلە کە لەڕۊ ئەمنییەوە هەوەجەمان وەپیانە خستیمنەسەی ناو لیستەگە".

ئی هەڵوێستە هاوەخت وەگەرد راگەیانن دەسەی راگەیانن و پەیوەندییەیل عراقی، لە مانگ تەمموز گوزەشتە تیەێد، لەباوەت ئیمزاکردن موڵەت کار کۆمپانیای "ستارلینک" وە شیوەیگ فەرمی لە وڵاتەگە، و یەیش لەناو رێوڕەسمیگ کە لە ژوور بازرگانی ئەمریکی لە ویلایەتە یەکگرتگەیل وەڕیەو چگ.

 دەسەی راگەیانن و پەیوەندییەیل لە سەرەتای تەمموز/ یۆلیۆی ئیسە، دووپات کردۊد کە رێکارەیل موڵەتداین خزمەتگوزاری "ستارلینک" رەسیەسە کۆتاییەیلی، وە جۊریگ کە ری دەێد وە چگنەناو یەکیگ لە دیارترین تەکنەلۆجیا هاوچەرخەیل پەیوەندییەیل ئاسمانی ئەرا ناو بازاڕ عراقی، لەناو چوارچیوەیگ رێکخستنی کە پارێزگاری لە بەرژەوەنییە نیشتمانییەیل کەێد و وەگەرد پیشکەفتنە جەهانییەیل گونجێد.