شەفەق نیوز/ هەردوگ پارێزگای کەرکوک و ئەنبار، لە شەوەکی زوی ئمڕوو، وەفروارین وەخوەیان دین، لە کەشوهەوای دەگمەنیگ، کە لە ماوەیل دویردویر بوود.

کەسیگ خەڵک کەرکوک وەناو جەنگیز عامر ئەرا ئاژانس شەفەق نیوز وت: لە ناوەند پارێزگای کەرکوک وەفر واری، یە دەیان ساڵە ئیجویرە نەویە. 

 دووپات کرد کە وەفروارین تا چەن ساعەتیگ وەردەوام بوی، و دویای ئەوە وسیاوە، بەشەیلیگ لە ناوەند پارێزگاگە پووشی، و جادە و ماشینەیل وە چەرمگ پووشیان.

 وتیش: ناوەند کەرکوک ئیجویر سیمایگ وەخوەی نەیە، هەمیشە بەشەیل باکوور کە وەفروارین توومار کردن.

کەسیگ ترەک وەناو کارزان غەریب ئەرا ئاژانس شەفەق نیوز وت: وەفروارین لە کەرکوک کاریگە یە دەیان ساڵە نەویە، هەرچەن کەرکوک کەفێدە کەنار کەشوهەوای هەرێم کوردستان، وەلێ هەمیشە بەشە فرەگە لە وەفروارین لە وەرز زمسانە کەفێدە بان کوێیەیل.

دووپات کرد کە وەفروارین رەنگینی دەێدە وەرز زمسان، و تابلۆییگ خودایی رەنگینیگ لەی میوانە تیەێد کە هەر دەیان ساڵ جاریگ سەردان شارەگە کەێد، کە لە ساڵ 2014 وەفروارین فرەیگ لە کەرکوک توومار کریاس.

دووپاتیش کرد کە ئی کەشوهەوا دووارەو نیەوود، و لەی ماوەی نزیکە جاریگ ترەک وەفر نیەوارێد، کە میوان گیان سووکیگە، و چیمنە پیرییەو، و گشتی چەوەڕی هاتنی کرد تا وینە لەناو جادەیل ئی شارە بکرن کە فرە چەوەڕی وەفر کرد.

هەرلیوا، کەسیگ خەڵک قەزای حەویجە وەناو حەسان عوبەیدی ئەرا ئاژانس شەفەق نیوز وت: ناوەند قەزاگە و ئاوایەیلی بڕەیل فرە لە وەفروارین لە ساعەتەیل شەفەق تا شەوەکی توومار کردن، و وەفر بان جادە و بووسانەیل پووشیە، لە دیمەنیگ کە چەن ساڵیگە لە قەزای حەویجە و ناحیەیلی توومار نەکریاس.

 پارێزگای ئەنبار، ئەوەیش وەفروارین وەخوای دی، کە لە شار قائیم، لە کەنار سنوور سوریا وەفروارین توومار کرد.

وەرجەیە، دەسەی کەشناسی عراق مەزەنەی داوەزیان پلەی گەرمی و وەفروارین لە چەن پارێزگایگ بیجگە هەرێم کوردستان لە سەرتای ئی هەفتەو تا ناوڕاسی کرد.