شەفەق نیوز- بەغداد

دادگای تاوانەیل ناوەندی، ئمڕوو چوارشەممە، بڕیاریگ وە لەسێدارەدان وەرانەور وە بازرگانیگ هووشبەرەیل دەرکرد، لەبان تاوان بازرگانیکردن وە مادەیل هووشبەر.

 دادگاگە لە بەیاننامەیگ رەسیە ئاژانس شەفەق نیوز، دیاری کرد کە تاوانبارەگە 85 کیلۆگرام لە مادەیل هووشبەر لەلای گیریاس، وە بڕ 489 هەزار حەب لە جۊر کەپتاگۆن، کە هاوریاسە ناو وە وەکارهاوردن باڵۆنیگ هەوایی کە تەکنەلۆژیای دیاریکردن شوینەیل (جی پی ئێس) وەپی بۊە ئەرا بازرگانیکردن وەپی و بڵاوکردنی لە ناوەین ئالوودەبۊەیل.

وتیش کە بڕیارەگە لەبانی دەرچگە وەپشتبەسین وە بڕگەیل مادەی 27/ یەکەم لە یاسای هووشبەرەیل و کاریگەرە دەروینییەیل شمارە 50 ئەرا ساڵ 2017، و وەنیشانەی مادەیل 47 و 48 و 49 لە یاسای سزایەیل.