شەفەق نیوز - بەغداد
سەرچەوەیگ سیاسی، رووژ سێشەممە، ئاشکرا کرد، کە فەرماندەی فەیلەق قودس لە سوپای پاسدارەیل ئیرانی، ئیسماعیل قائانی، رەسیەسە عراق وە شیوەی کلکریای لە ریبەر ئیرانی موجتەبا خامنەئیەو، لە ئەرکیگ پەلەدار ئەرا کۆنترۆڵکردن ئاڵووزییە پەرەسەنەگە لە ناوەین سەرۆک وەزیرەیل عەلی زەیدی و کەتیبەیل حزبلڵا لەباوەت جوڕف سەخەر، و ریگریکردن لە چگن قەیرانەگە وەرەو رۊوەرۊبۊنیگ سەربازی.
سەرچەوەگە ئەرا ئاژانس شەفەق نیوز وت، کە قائانی ئیوارەی دۊکە رەسیەسە پارێزگای نەجەف و زنجیرەیگ گردەوبوین لە بەغداد وەرد سەرکردەی گرووپە چەکدارەیل و کەسایەتییە دیارەیل لە چوارچیوەی هەماهەنگی ئەنجام داگە، کە باس وەرەونواچگنەیل قەیران جوڕف سەخەر و ئەو مووڵەتە بۊ کە زەیدی دیاریی کردگە ئەرا کۆتاییهاوردن وە کۆنترۆڵ کەتیبەیل حزبولڵا لەبان ناحیەگە.
دیاری کرد کە قائانی کەسەیل گردەوبوینەگە ئاگادار کردگە کە ئەوە "کلکریایەی لە ریبەر ئیرانییەو وە ئەرکیگ دیاریکریاگ ئەرا کۆتاییهاوردن وە قەیرانەگە، و نیەخوازێد گلەو بخوەێد ئەرا تاران وەبی رەسین ئەرا چارەسەرەیل"، وباسکردن ئەوە کە دووپات کردەسە بان هەوەجەی ئارامکردن و خەسەوکردن گیرهاتنە سیاسییەیل لەبان سەرۆک وەزیرەیل ئەرا ریگریکردنی لە پەنابردن ئەرا وژاردەی سەربازی لە دژ کەتیبەیل.
وەپەی سەرچەوەگە، ئەو دیدار و ناوبژیوانییەیلە کە قائانی لە ماوەی سەعاتەیل گوزەشتە ئەنجامیان داگە هێمان هیچ دەرەنجامیگ لیان نەکەفتەسەو، لە سای رکداری زەیدی لەبان هەڵوێستەگەی و رەتکردن ئەو زوورە کە ئامانجیان پەشیمانکردنە لە چەسپانن کۆنترۆڵ هێزە حکومەتییەیل لەبان تەواو جوڕف سەخەر.
دووپات کرد کە فەرماندەی فەیلەق قودس هێمان لەناو عراقە، وەلێ بەغداد جیهیشتگە، لە وەختیگ ئامادەکارییەیل ئەرا بەسانن چەوپیکەفتنەیل نوو وەرد سەرکردایەتییە سیاسی و گرووپەیل کریەێد، لە تەقەڵایگ ئەرا نزیککردن نووڕینەیل و دۊرکەفتن لە رۊوەرۊبۊنیگ چەکداری کە شایەد دەرەنجامەیلی وەرەو ناوچەیل ترەک فراوانەو بوود.
لەی چوارچیوە، سەرچەوەیگ لە چوارچیوەی هەماهەنگی ئەرا ئاژانس شەفەق نیوز خەوەردا، کە قائانی لە پارێزگای نەجەف ئامادەس، وەختیگ چەوی کەفتەسە کەسایەتییە ئایینییەیل و گووش داسە نووڕینەیل لایەنە نزیکەیل لە مەرجەعییەت ئایینی لەباوەت قەیرانەگە.
ئاشکرا کرد کە شمارەیگ لە کەسایەتییەیل شەوەکی سێشەممە رەسینەسە نەجەف ئەرا چەوپیکەفتن قائانی، و باسکردن وژاردەیل لەرۊخریاگ ئەرا کۆتاییهاوردن وە ئاڵووزییەگە، هاووەخت وەرد سەردان سەرۆک وەزیرەیل عەلی زەیدی ئەرا پارێزگاگە ئەرا وازکردن پیەڵ ئیمام عەلی و بەسانن دانیشتن هەفتانەی ئەنجومەن وەزیرەیل.
سەرچەوەگە چەوەڕی بەسانن دیداریگ لە ناوەین قائانی و زەیدی کەێد، کە دۊای ئەوە گردەوبوینیگ وەرد نۊنەرەیل کەتیبەیل حزبولڵا تیەێد ئەرا ئاگادارکردنیان وە رخباری هەڵوێستەگە، و تەقەلای رەسین ئەرا ریککەفتنیگ کە رێگری لە جیوەجیکردن وژاردەی سەربازی بکەێد.
وتیش کە یەکیگ لە پێشنیارەیل ئاڵشتکردن هێزەیل سەر وە کەتیبەیل حزبولڵا لە جوڕف سەخەر وە لیوایەیل لە حەشد شەعبی و هێزەیل لە پۆلیس فیدراڵی لەخوەی گرێد، ئەرا پاڵپشتییکردن هێزەیل دەزگای دژەتیرۆر، وەرد وەردەوامبۊن لێکۆڵینەوە حکومەتییەیل لە دۆسیەی قاچاخچێتی نەفت.
سەردان قائانی تیەێد لە دۊای گردەوبوینیگ ئاڵۆز کە چوارچیوەی هەماهەنگی وەرد سەرۆک وەزیرەیل، ئیوارەی دوشەممە، بەسا، و وەبی ریککەفتنیگ لەباوەت جوڕف سەخەر کۆتایی هات، لە ناوڕاس ناکۆکییەیل تون لەباوەت مۆڵەتە حکومەتییەگە و دەرەنجامەیل جۊلە سەربازییە چەوەڕیکریاگەگە.
سەرچەوەیگ ئاگادار ئەرا ئاژانس شەفەق نیوز ئاشکرا کردۊد کە زەیدی سەرکردەیل چوارچیوەگە ئاگادار کردگە لە رکداریی لەبان کۆنترۆڵ تەواوەتی لەبان ناحیەگە، و رەتکردن دریژەوکردن ئەو مۆڵەتە کە ئیوارەی جمعەی ئایەندە کۆتایی تیەێد، وە دووپاتکردن ئامادەیی هێزەیل ئەرا جیوەجیکردن ئۆپەراسیۆنە سەربازییەگە لە ئەگەر جیوەجینەکردن داواکارییە حکومەتییەیل.
وەپەی سەرچەوەگە، گردەوبوینەگە دەمەقاڵیگ لەناوی بۊە لە ناوەین زەیدی و سەرۆک ریخریاگ بەدر هادی عامری، لەبان ئەو هوشدارییەیلە کە وەکارهاوردن هێز شایەد بۊە هووکار شیویان ئەمنی لە زیاتر لە شاریگ عراقی، وەرجە ئەوەگ سەرۆک وەزیرەیل نیشتنەگە وەجی بیلێد وەبی رەسین ئەرا لەیەکفامستنیگ.
ناکۆکی لە ناوەین حکومەت و کەتیبەیل حزبولڵا پەرە سەن لەبان لێکۆڵینەوە فەرمییەیل لە گومانەیل قاچاخچێتی نەفت و بەرهەمەیلی لە جوڕف سەخەر لە باکوور پارێزگای بابل، کە هیشت زەیدی رێنماییەیل چەسپانن دەسەڵات دەوڵەت لەبان ناوچەگە دەرکەێد، لە وەختیگ کەتیبەیل دەسیان لە پرۆسەیل قاچاخچێتییەگە رەتەو کەن.
رکداری زەیدی لەبان جیوەجیکردن بڕیار ناوبژیوانییە سیاسییەیل، کە جۊلە ئیرانییە دواییەگەیش لەخوەی گرێد، خەێدە وەر تاقیکردنیگ یەکلاکەرەوە وەرد نزیکەوبۊن کۆتاییهاتن مۆڵەتەگە ئیوارەی جمعە، لە ناو رخەیل لە ئاڵشتکردن ناکۆکی لەباوەت کۆنترۆڵ ئەمنی لەبان جوڕف سەخەر ئەرا رۊوەرۊبۊنیگ چەکداری.