شەفەق نیوز/ سەرچەوەیگ خۆجێی، ئمڕوو شەممە، خەوەردا وە زەخمداری دوو کەس لەوەر تەقینەوەی بومبیگ دەسی لە دەورگرد قەزای خاڵس لە پارێزگای دیالە.

سەرچەوەگە ئەرا ئاژانس شەفەق نیوز وت: نارنجەیگ ک سەرچەوەگەی نەناسریاگە، لە ناوجەی ''حەی عەسری'' تقیەو لە دەورگرد قەزای خاڵس، و بوویە هووکار زەخمداری دوو کەس، یەکیگیان خاوەن موەلدەی کەهرەباس، و هەردوگیان ئەرا خەسەخانە بریان.

سەرچەوەگە وتیش؛ هێزە ئەمنیەگان لێکۆڵینەوەیگ کردنەو ئەرا ئاشکراردن ووردەکاریەیل رووداوەگە.

لەلاییگ تر، ئاژانس هەواڵگیری لە وەزارەت ناوخۆ راگەیان دەسگیرکردن یەکیگ لە سەرکردەیل ریخریاگ داعش لە پارێزگای کەرکوک.

ئاژانسەگە لە بەیاننامەیگ ئمڕوو وت: مەفرەزەگانی لە هەواڵگیری پۆلیس فیدڕاڵی لە وەزارەت ناوخۆ، دەسگیر یەکیگ لە سەرکردەیل داعش کردن لە ناحیەی ئاڵتون کوپری لە پارێزگای کەرکوک، ک چەن پۆستیگ فەرماندەیی وەرگرد لەلیان ''پیاوەیل تەریقەت نەقشەبەندی'' لە ساڵ ٢٠٠٧ و دویای ئەوە کەفتە ناو ریخریاگ قاعیدە لەساڵ ٢٠٠٩ لە ناو وەلایەت سەڵاحەدی، وبویە فەرماندەی مەفرەزەیگ سەربازی، و وەردەوامبوی لە کارەیل تیرۆر دژوە هێزەئەمنیەگان وهاووڵاتیەیل.

ئاژانسەگە وتیش؛ لە ساڵ ٢٠١٤ تیرۆرستە گیریایەگە فەرماندەی کەتیبەی سدیق بوی لە کەرت سەڵاحەدین لە ریخریاگ داعش، وخوەییش لە خیزانیگ داعشە و دوو برای هانە ناو ریخریایە تیرۆرەگە.