شەفەق نیوز- دیالە/ نەینەوا/ بەغداد

سەرچەوەیگ ئەمنی، ئمڕوو چوارشەممە، خەوەر دا لە خوەیکوشتن پیاویگ لە گەڕەک شورتە سەر وە ناحیەی بوهرز، لە باشوور شار بەعقوبە لە دیالە، لە وەختیگ پۆلیس ئاوی لە موسڵ تۊنست دۊتیگ رزگار بکەێد کە تەقلای خوەیکوشتن دا لەبان پیەڵ چوارەم.

 سەرچەوەگە ئەرا ئاژانس شەفەق نیوز وت، کە "عەبدولمونعم قاسم یاس خەلیل رفاعی، لە داڵگبۊ 1957 و رانندەی ماشینیگ تاکسیە،  خوەی وە سێدارە وە پەت لەقەی قەواسەی ماڵەگەی کوشتیە لەناو گەڕەک شورتە لە ناحیەی بوهرز".

وتیش کە "زانیارییە سەرەتاییەیل نشان دەن کە مدووەیل خوەیکوشتنەگە گلەو خوەێد ئەرا هوکارەیل مادی و دەروینی"، وە و لایەنە پەیوەندیدارەیل دەس کردنەسە لێکۆڵینەوە لە رۊداوەگە.

 لە نەینەوا، سەرچەوەیگ ئەمنی ترەک وت کە مەفرەزەیل پۆلیس ئاوی تۊنستن دۊتیگ رزگار بکەن کە  خوەی لەبان پیەڵ چوارەم لە شار موسڵ وەرەو چەم دیجلە وەشانیە، لە وەختیگ سێ کەس زەخمدار بۊن، کە ئەفسەریگ پۆلیس لەناویانیە، وە رۊداویگ هاتوچو کە هاوەخت بۊ وەرد وەدەمچگن ئەرا خەوەرەگە.

سەرچەوەگە ئەرا ئاژانس شەفەق نیوز دیاری کرد کە "دەوریەیل و بەلەمەیل پۆلیس ئاوی کە لە ئاوەیل چەم دیجلە بڵاو بۊنە دەسوەجێ جۊلیان و تۊنستن دۊتەگە لە ئاوەگە درارن و رزگاری بکەن لە خنکیان دۊای چەن ساتیگ لە فڕەداین خوەی لەبان پیەڵ چوارەم".

 دیاری کرد کە "دۊتەگە لە داڵگبۊ 2009ە، و مدووەیل تەقەلای خوەیکوشتنی لە ئەنجام گیچەڵ و کیشەیل خیزانی بۊە"،  فریاگوزاری ئەڕای جیوەجی کریا وەرجەیەگ وە شیوەیگ یاسایی بیریەێدە دەس بنکەی پۆلیس فەیسەڵیە، وەرد وازکردن لێکۆڵینەوەیگ فەرمی لە رۊداوەگە ئەرا زانستن چۊنیەتیی.

 لەی چوارچیوە، سەرچەوەگە وتیش "یەکیگ لە دەوریەیل پۆلیس، و ماوەی وەرەوچگنی وە هشکانی و وە تونترین خێرایی وەرەو شوین رۊداوەگە وەدۊای وەرگردن خەوەرەگە، تۊش رۊداویگ هاتوچو هات کە سێ ماشین لەخوەی گرد، کە بۊە مدوو زەخمداربۊن سێ کەس وە زەخمداری جیاجیا، کە ئەفسەریگ پۆلیس وە پلەی مولازم لەناویانە"، و دیاری کرد کە زەخمدارەیل ئەرا خەسەخانە بریان.

 لە رۊداویگ ترەک، سەرچەوەیگ ئەمنی خەوەر دا لە کوشیان کەسیگ دۊای دەمەقاڵیگ وەرد کەسیگ ترەک لە ناوچەی دسێم، دۊای پەرەسەنین دەمەقاڵەگە لە ناوەینیان ئەرا وەردەوەردە وەکارهاوردن چەک چەرمگ.

 سەرچەوەگە ئەرا ئاژانس شەفەق نیوز وت، کە "دەمەقاڵیگ لە ناوەین دوو کەس لەوەر هوکارەیلیگ کە تا ئیسە نەزانریاگە، وەرجە ئەوەگ یەکیگیان چەقوو وەکار بارێد و لە لایەنەگەی ترەک بەێد، کە بۊە مدوو کوشتنی"، وتیش "هێزیگ ئەمنی تۊنست تاوانبارەگە دەسگیر بکەێد وەرجە ئەوەگ بواێد".