شەفەق نیوز/ سەرچەوەیگ ئەمنی، ئمڕوو شەممە، خەوەردا لە کوشیان دویەت مناڵیگ لەئەنجام تەقەکردن لەبان ماڵیان لە ناوچەی حەبیبیە لە بەغداد.

سەرچەوەگە ئەرا ئاژانس شەفەق نیوز وت: کابرایگ تەقە لەبان ماڵیگ لە ناوچەی حەبیبیەی خوەرهەڵات بەغداد کرد، ئەوەیش لە جیوەجیکردن "دەگەی" هووزانە، دویای گرفتیگ خیزانی، ک بویە هووکار کوشیان دویەت مناڵیگ.

دیاری کرد ک هیزیگ ئەمنی چیە ناو ماڵ تەقەکەروگە دویای توومارکردن سکاڵا لەلایەن خاوەن ماڵەگە، وەلێ پیای نەکردن، وتیش: هیزە ئەمنیەگە چەکی کلاشینکۆف پەیا کرد.

جی باسە ک "دەگەی" هووزانە، ئەوەسە ک هەنای کەسیگ بتواێد هەڕەشەی کەسیگ بیەێد، چوودە دەر ماڵەگەی و چەن گولەیگ لەبان ماڵەگەی وەشنێد.