شەفەق نیوز/ موستەفا کازمی سەرۆک وەزیران، ئمڕوو پەنجشەممە، پەیمان چارەسەرکەردن گرفت مووچەگان و شایستە داراییەگان ئارا کشاورزەگان دا، و هەمیش هاوردەی تڵا لە فڕۆکەخانەیل هەرێم کوردستان، وەگورەی بەشیر حەداد جیگر سەرۆک پەرلەمان عراق.
حەداد لە وتاریگ رۆژنامەوانی لەدویای رسوومەیل پرسەی ئەندامیگ لە پەرلەمان ک وەی دویاییە وە لەوەر کۆڕۆنا مرد وت: چەومان کەفتە موستەفا کازمی سەرۆک وەزیران، و باس لە بڕیگ لە باوەتەگان وەگەردیا کردیمن، لەلیان مووچەی فەرمانبەرەیل هەرێم کوردستان ک لە چەن مانگیگ لەی ساڵە نەدریانە.
وتیش؛ کازمی وت: خوەی بڕوا دیرێد ک ئەو پویلەگ ئەرا هەرێم کوردستان رەوانە کریەێد فرە لە شایستەیلیان کەمترە، و کەسەیلیگ هەن لە ناو و دەیشت پەرلەمان دیرن ریگری لە کار حکومەت فیدڕاڵی کەن.
حەداد ئاماژە کرد ک کازمی دووپاتکرد لە گرنگی ئەوە ک پەرلەمان پشتگیری رێککەفتنەگەی هەولێر و بەغداد بکەێد، دەربارەی چارەسەرکەردن مووچەگان نەگ ریگری لەلی بکەێد.
حەداد وتیش؛ کازمی دووپاتکرد لە کۆتایی هاوردن لە گرفت مووچەگان و رێککەفتنەگە وەگەرد هەرێم کوردستان جیوەجی بکریەێد، و مووچەگان ئەرا هەرێم رەوانە بکریەن و خەرجیان ئەرا ئەو مانگەیلە بکریەن ک دابەشیان ئەرا فەرمانبەرەگان نەکریاگە.
جیگر سەرۆک پەرلەمان هەمیش وت: کازمی تەقەلای پەیاکردن رێککەفتنیگ سیاسی لەناوبەین لایەنە عراقیەگان کەێد ئەرا چارەسەرکەردن گرفت بەش هەرێم لە بوودجەگە و مووچەی فەرمانبەرەیل وەیەک باوەت.
حەداد وتیش؛ کازمی ئەرامان پەیمان دا و وت؛ ری نیەیمن ک هاووڵاتی و کەسەیلمان لە کوردستان وەبی مووچە بمینن.
دەربارەی شایستەیل کشاورزەگان لە هەرێم، حەداد لە زووان کازمی وت: کشاورزەگان ستەمگیری کریانە، و کازمی پەیوەندی وە وەزیر بازرگانی و وەزیر دارایی کرد وداوا لەلیان کرد چارەسەری گرفت شایستە داراییەگان بکەن.
دەربارەی وسانن هاوردەی تڵا لە فڕۆکەخانەیل هەرێم کوردستان، حەداد وت؛ کازمی پەیمان وە چارەسەکردن ئی باوەتیشە دا.