شه‌فه‌ق نيوز/ وه‌رپرسيگ ناوچه‌يى له دياله، ئاشكراى ئه‌وه كرد زياتر له 60 پرووژه‌ى زينگ له قه‌زاى باقووبه ناوه‌ند پاريزگاگه له‌كار وسيانه، ئه‌ويش له‌وه‌ر چه‌ن هووكاريگ له‌وانه‌يش قه‌يران ڤايرۆس كۆرۆنا.
له‌ى باوه‌ته‌و، عه‌بدوڵڵا ئه‌حمه‌د حه‌يالى قايمقام باقووبه ئه‌را شه‌فه‌ق نيوز وت: زياتر له 60 پرووژه له‌سه‌رجه‌م كه‌ره‌يل له باقووبه له‌كار وسيانه له ئه‌نجام كاريگه‌رى قه‌يران كۆرۆنا و هووكاره‌يل تر، ئاماژه وه‌يه‌يش كرد نزيكه‌ى 25% له‌و پرووژه‌يل وسياگه دوباره كه‌فتنه‌سه كار دوياى سووكه‌وبوين قه‌يه‌غه‌ى هاتوچوو له هه‌فته‌ى گوزه‌يشت.
حه‌يالى باس له‌وه‌يش كرد كه‌مى ته‌مويل دارايى و دوياكه‌فتن جيگيركردن بودجه‌ى ناوه‌ندى فريه‌يگ له‌و پرووژه‌يل خزمه‌تگوزارى و عومرانيه له‌سه‌رجه‌م دياله وسانگه‌و داوايش كرد هه‌وه‌جه‌ى دارايى و هونه‌رى ئه‌و پرووژه‌يله ده‌سه‌وه‌ر بكريه‌ێد ئه‌را ئه‌وه‌گ دوباره ده‌س بكه‌نه كار.