شەفەق نیوز - بەغداد
سەرۆک پەرلەمان ئیرانی محمد باقر قالیباف وە یاوەری شاندیگ ئاست بەرز لە وڵاتەگەی، شەوەکی ئمڕوو چوارشەممە، رەسیە بەغدادپایتەخت عراق، لە سەردانیگ فەرمی کە ئەرا ماوەی سێ رووژ یەک لەدۊای یەک وەردەوام بوود.
پەیامنێر ئاژانس شەفەق نیوز وت، کە عەدنان فەیحان جیگر یەکەم سەرۆک ئەنجومەن نوێنەرەیل عراقی لە پیشوازی قالیباف و شاند یاوەری بۊ لە فڕگەی ناودەوڵەتی بەغداد.
هەمیش وت کە بڕیارە گردەوبوینیگ پەرلەمانی ناونی هەردوگ شاند ئیرانی و عراقی بوەسیەێد، و دۊای ئەوە دیداریگ ناونی هەردوگ سەرۆک پەرلەمان وڵاتەگە تیەێد، دۊاتر قالیباف وەرەو سەرۆکایەتی کۆمار چوود ئەرا دیدار سەرۆک کۆمار عراقی نزار ئامێدی.
دۊای نیمەڕو چوارشەممە، شاند ئیرانی لە ئەنجومەن وەزیرەیل چەوی وە شاند عراقی کەفێد، لە وەختیگ ئیوارە دیداریگ ترەک وەگەرد چوارچیوەی هەماهەنگی وە ئامادەبۊن سەرۆک ئەنجومەن وەزیرەیل بەسیەێد.
شەوەکی سوو پەنجشەممە، سەرۆک پەرلەمان ئیرانی، هەر یەکیگیان جیا، چەوی وە سەرۆک ئەنجومەن دادوەری باڵا فایەق زێدان و راوێژکار ئاسایش نەتەوەیی قاسم عەبوودی کەفێد.
دۊای ئەوە وەرەو کەربەلا چوود ئەرا بەشداریکردن لە رسوومیگ تایبەت چلەی وەخاکناین تەرم ریبەر باڵای ئیرانی کووچکردی ئایەتلڵڵا عەلی خامنەیی، هەرلیوا چەوی وە وەرپرسەیل هەردوگ عەتەبەی حوسەینی و عەباسی کەفێد ئەرا پیشکەشکردن سوپاس لەبان ئەوەگ پیشکەشی کردنە مەوقەی رسوومەیل وەڕیکردن تەرم ریبەر کووچکردیەگە.
شەوەکی جمعە، قالیباف وەرەو نەجەف چوود، کە لەورا سەردان قەورسان جیگر سەرۆک دەزگای حەشد کووچکردی "ئەبو مەهدی موهەندس" کەێد، دۊاتر چەوی وە وەرپرسەیل ئەمینداریەتی گشتی ئەرا عەتەبەی عەلەوی کەفێد، تا وەی جۊرە کووتایی وە سەردانە فەرمییەگەی ئەرا عراق بارێد.