شەفەق نیوز/ "قەورسان سەربازەیل ئینگلیزی" لەناوڕاس بەخدا گەواهیدەر زینیگە ئەرا ئەو جەنگ و ویرانکاریە کە لە سەدەی گوزەشتە رویدایە، هەرچەن ئێ شوینە وە یەکیگ لە بەشە گرنگەیل میژوو پایتەخت عراق دانریەێد باوجی رویوەڕی پشتگووش خستن بویە.
قەورساەگە کەفێدە ناوچەی باب ئەلموعەزەم لەناوڕاس کۆمە زانکۆیەیل عراقی، و روفات سەدان سەرباز بەریتانی گرێدە خوەی کە لە جەنگ جەهانی یەکەم کوشیانە لە دژ عوسمانیەیل کە کۆنترۆل عراق کردوین.
قەورسانەگە دەورە دریاگە وە (کۆمەڵەی باب ئەلموعوزەم و کۆلێژ هونەرە جوانەیل و کۆلێژ ئەندزیاری موستەنسەریە).
کامیرای ئاژانس شەفەق نیوز تووماریگ کردیە لە قەورەیل سەربازەگان ئینگلیز لە قەورسانەگە کە وە مدوو کەشوهەوای سەخت لە وەرز زمسان و تاوسان بەشیگ فرە لە نوسریاگ و بەڵگەیل و ناو و بڕوارەیل کوشیاگەیل ناو قەورسانەگە سڕیاسەو.