شەفەق نیوز- بەغداد

قەرز گشتی ناوخوەیی عراق ئەرا زیاتر لە 117.2 تریلیۆن دینار تا کۆتایی مانگ ئەیلوول/ سێپتەمبەر 2026 بەرزەو بوی، وە زیایبوونیگ وە نزیک 26.7 تریلیۆن دینار وە بەراورد وەرد کۆتایی ساڵ 2025 توومار کرد، کە رەسیە 90.5 تریلیۆن دینار، وەپای نیشانە ئابوورییەیل دەرچگ لە بانک ناوەندی عراق.

ئەو داتایەیلە کە ئاژانس شەفەق نیوز ئاگاداریان بوی، بەرزەوبوین قەرز ناوخوەیی وە رێژەی 29.5% لە ماوەی نۆ مانگ یەکەم ساڵ 2026 نیشان دەن، لە وەختیگ زیایبوونیگ مانگانە وە نزیک 3.7 تریلیۆن دینار وە بەراورد وەرد مانگ ئاب/ ئۆگست گوزەشتە توومار کرد، کە رەسیە 113.4 تریلیۆن دینار.

قەرز ناوخوەیی لە کۆتایی ئەیلوول لەبان چوار پێکهاتەی سەرەکی دابەش بوی، و داواکارییەیل وەزارەت دارایی ئەرا بانک ناوەندی لە بانیان هاتن و رەسینە 80.499 تریلیۆن دینار، لە دویای ئەوە قەرزەیل وە بەهای 18.932 تریلیۆن دینار، ئمجا چەکەیل وە نزیک 9.330 تریلیۆن دینار، و حەواڵەیل ئەمارەسل  رەسینە 8.461 تریلیۆن دینار.

داتایەیل ئاشکرا کردن داواکارییەیل وەزارەت دارایی ئەرا بانک ناوەندی نزیک 68.7% لە گشت قەرز ناوخوەیی پێک تیەرن، کە وە گپترین پێکهاتە لە پەیکەر قەرزداری ناوخوەیی عراق دانریەێد.

قەرز گشتی ناوخوەیی لە کۆتایی ساڵ 2023 رەسیە 70.5 تریلیۆن دینار، وەرجە ئەوەگ لە کۆتایی ساڵ 2024 ئەرا 83.05 تریلیۆن دینار بەرزەو بوود، ئمجا لە کۆتایی ساڵ 2025 ئەرا 90.5 تریلیۆن دینار، تا لە ماوەی ساڵ 2026 وەردەوام بوود لە بەرزەوبوین و لە کۆتایی ئەیلوول بڕەسێدە 117.2 تریلیۆن دینار.