شەفەق نیوز ـ بەغدا

داتا داراییەیل دەرچگ لە بانک ناوەند عراقی، بەرزەوبوین قەبارەی قەرز گشتی ناوخۆی عراقی نیشان دەن وە 106.072 تریلیۆن دینار لە کۆتایی حوزەیران 2026، بەراوەرد وەرد 103.179 تریلیۆن دینار لە کۆتایی مانگ ئایاری گوزەشتە، کە  2.893 تریلیۆن دینار لە ماوەی مانگیگ زیایبویە.

وە پای داتاگە، کە ئاژانس شەفەق نیوز لە زانیاری لەبانی وەرگردیە، قەرز ناوخۆی لە 90.515 تریلیۆن دینار لە کۆتای ساڵی 2025ەوە رەسیە 106.072 تریلیۆن دینار لە کۆتایی حوزەیران 2026، زیایبوی وە 15.557 تریلیۆن دینار لە ماوەی شەش مانگ یەکەم ساڵەگە.

قەرزی ناوخۆی بەشەو کریاس بان بڕ  داواکاریەیل وەزارەت دارایی لە بەرژەوەندی بانک ناوەندی، کە لە کۆتایی حوزەیران رەسیە 67.499 تریلیۆن دینار، وە وەراوەرد وەرد 63.199 تریلیۆن دینار لە کۆتایی ئایار، لەوەختیگ هەواێەی خەزینە رەسیە 8.742 تریلیۆن دینار، قەرزەیل 18.964 تریلیۆن دینار بوین، و سەنینەیل 10.867 تریلیۆن دینار توومار کرد.

بەرزەوبوین قەرز ناوخۆی وەرد توومارکردن خەرجیە گشتیەیل وە 46.697 تریلیۆن دینار تا کۆتایی ئایار هات، هنای  داهات گشتی رەسیە 33.747 تریلیۆن دینار، یەیش وەردەوامبوین  جیاوازی لەناوەین داهات و خەرجی نیشان دەن، ئەو جیاوازیە حکومەت ناچار کەێد پشت وە ئامرازەیل قەرز بوەسێد ئەرا دابینکردن هەوەجە داراییەیل.