شەفەق نیوز/ خیزان کاپتن ئەحمەد رازی بازیگەر ناودەوڵەتی وەرین عراق، ئمڕوو شەممە، راگەیانن خستەڕوو تەنیا ماڵەگەی لە عەمان پایتەخت ئوردن ئەرا فرووشتن، وەخاتر دانەوەی قەرزەیلیگ دارایی ئەرا دروسکردن پڕۆژەیک وەرزشی و بەرهەمهاوردن لە بەغداد.

ئەمیر دعێمی پارێزەر خیزانەگەی کاپتن ئەحمەد رازی لە بەیاننامەیگ رەسیە ئاژانس شەفەق نیوز وت:

ماڵپەڕەیل پەیوەندیە کۆمەڵایەتیەکان باس خەوەر فرووشتن ماڵ کاپتن ئەحمەد رازی کردن، ک خوەی تەنیا میراتییگە رەحمەتی هیشتەی جی، و دیاری کرد ک کاپتن قەرزیگ لە دەوڵەت کردگە، ئەرا پڕۆژەیگ وەرزشی و بەرهەمهاوردن لە بەغداد، و وەرانوەر ئەو قەرزەیلە ماڵداری کەسوکارەیل کاپتن گیر هاوریاگە.

وتیش؛ ئمڕوو لە کاپتن داوای قەرزەگە کریاگە، و چوونکە خوەی تەنیا یەک ماڵ لە عەمان ئەرا نیشتن خیزانەگەی هیشتە جی، و مووچەیگ خانەنشینی لە یەک مەلیۆن ونیم رەد نێکەێد، هەر دوو مانگ ئەو پویلەیلە وەدەس خوەم رەسنمە خیزانە نەدارەگان، و چوونکە داوای قەرزەگە لە خیزانەگەی کریاگە، بڕیار فرووشتن تەنیا ماڵەگەیان دان ک لەناوی دانیشتنە.

وتیش؛ ئەرا زانیاری ، دەوڵەتەیلیگ خەلیجی مکیس کردن ک خیزانەگەی کاپتن بگرنە خوەیان و گشت خوازینان جیوەجی بکەن، بەڵکم خیزانەگەی وە گشت سەربەرزیبگ لەوە رازی نەوین، و سوپاس لەو دەوڵەتەیلە کەن ک ئەو هەڵمەت خانەدانیە کردن.

هەمیش وت: وەرانوەر ئەوە، دەوڵەت عراقی ک ئەحمەد رازی خزمەتی کرد و ناو عراق لە بۆنەیل گشت جهان بەرزەو کرد، لەبان گشت پەیوەندیەکان و تەقەلاکان، هیچ جوولەیگ نەکرد، و قەرزەگە یا بەشیگ لەلی لەبانی نەسڕیەو، و دووپات کرد ک خیزانەگە رازی وە هیچ پویلیگ لە هەر لایەنیگ وە هەر ناونشانیگ نێوون، و سوپاس لە هەست و وەفادارییان ئەرا کاپتن کەن، و وەیەکجاری رەت کەن لەی باوەتە یا باوەتیگ تر وەناویان قسە بکریەێد، و ئی چشتە باوەتیگ تایبەت وەخوەیانە و نێخوازن لە راگەیانن باسی بکریەێد، ک کار ئمڕوو نییە، و سەرسامن ک لەی وەختە باسی کریەێد.