شەفەق نيوز/ بڕیگ لە ئەندامەیل فەوج حەشد هووزانە، داد لە دەس فەرماندەی فەوجیان کردن کە زوور لەلییان کەێد هەر یەکیگیان 15 کارت هەڵوژاردن گردەو بکەێد، و تا رووژ یەکشەممە ئەگەر ئەو کارە ناکەن وەنە مووچەیان بڕێد.
ئەو ئەندامەیلە لە حەشد هووزانە لە ناحیەی رەبیعە خوەرئاوای موسڵ، لە قسەیلیان ئەرا ئاژانس شەفەق نیوز دیاری کردن کە فەرماندەی فەوج هووزانە زوور کەورەیگ لەلیمان کەێد تا کارتەیل هەڵوژاردن گردەو بکەیمن، و هەڕەشە دەێد ئەگەر لەو رووژە پابەند نەویمن مووچەیلمان بڕێد.
ئەو ئەندامەیلە کە داوا کردن تاویان ئاشکرا نەکریەێد، لە رخ وەشوینکەفتن یاسایی، وتن؛ بەدوەکارهاوردن لەناو فەوجەگە لەلایەن کوڕ یەکیگ لە دەمچەرمگەیل هووزەیل هەس، کە ئەو زورە لەبان ئیمە زیای کەرد.
ئەو ئەندامەیلە داوا لە دەزگای حەشد شەعبی کردن دەسبیەنەوەر تا سنووریگ ئەرا ئی کارە بنەن، و ئەرا هەڵوژاردن دەسیان پیچەو نەیەن.