شەفەق نیوز - نەجەف
موسەننا تاڵقانی، جیگر وەڕێوەبەر راگەیانن و پەیوەندییە گشتییەیل لە فڕۆکەخانەی ناودەوڵەتی نەجەف، ئمڕوو چوارشەممە، دووپات کرد لەبان وەردەوامبۊن گەشتەیل ئاسمانی لە و وەرەو شوینەیل جیاجیا، و وە تایبەت ئەو گەشتەیلە کە وەرەو ئیران چن و لەلیەو تیەن، وەپەی خشتە راگەیانریایەیل.
تاڵقانی ئەرا ئاژانس شەفەق نیوز وت، کە "فڕۆکەخانەی ناودەوڵەتی نەجەف وەردەوامە لە وەڕێوەبردن گەشتەیل ئاسمانی وەپەی خشتە راگەیانریایەیل، و هیچ ریگرییگ لەی باوەتە نییە".
وتیش کە "فڕۆکەخانەگە پابەندە وەو رێنماییەیلە کە لە حکومەت عراقییەو دەرچن لەباوەت گەشتەیل ئاسمانی، و لە رەوش دەرچگن هەر بڕیاریگ ئەرا وسانن گەشتەیل وەرەو ئیران، وەڕێوەبەرایەتی فڕۆکەخانەگە پابەند بوود وەپی و جیوەجیی کەێد".
وتیش: "گەشتەیل وە رەوانییگ بەرز وەڕیەو چن، و هیچ وسانیگ نییە وەپەی ئەو خشتە راگەیانریایەیل لەلایەن کۆمپانیایل فڕۆکەوانییەو"، و دیاری کرد کە "هیچ رێنمایییگ لەباوەت وسانن گەشتەیل تا ئیسە لە حکومەت عراقی یا پارێزگای نەجەف یا لایەنە پەیوەندیدارەیل لە دەسەڵات فڕۆکەوانی شارستانی دەرنەچگە".
تاڵقانی دووپات کرد کە "فڕۆکەخانەی ناودەوڵەتی نەجەف ئامادەس ئەرا جیوەجیکردن هەر بڕیاریگ کە لەلایەنە ناوەندییە تایبەتمەنەیلەو دەرچوود، و پابەندبۊن وە رێنماییە جیوەجیکریاگەیل پەیوەندیدار وە وسانن گەشتەیل یا دەسوەپیکردنیانەو".
دەسەڵاتەیل ئیرانی عراق ئاگادار کردۊن لە ئەگەر پیشوازینەکردن لە گەشتەیل ئاسمانی هاتگ لە گشت دەوڵەتەیلەو، لە (دۊکە سێشەممە)ەو، وەرد ئەگەر دریژەوکردن بڕیارەگە ئەرا چەن رووژیگ، وەپەی ئەوەگ سەرچەوەیگ ئەمنی ئەرا ئاژانس شەفەق نیوز خەوەر دا.
دۊاتر، وەزیر گەنجینەی ئەمریکی سکۆت بێسنت، پیرەکە دووشەممە، خەوەر دا کە کۆمپانیایل فڕۆکەوانی ئیرانی ماوەی دوو رووژ لە کارکردن لە دەورگرد جەهان وسن.
قەیەغەکردن ئەمریکی لەبان کۆمپانیایل فڕۆکەوانی ئیرانی شوینەوارەیلیگ لەبان ئاژانسەیل گەشتکردن عراقی هاوردە دی، کە بڕیگ لە کۆمپانیایەل دەس کردنە هەڵوەشانن گەشتەیل یا ئاڵشتکردنیان وە ریەیل هشکانی، لە وەختیگ بڕیگیان وسیان لە وەرگردن شۊنگردن ئاسمانی نوو لە ناوڕاس نەوین ئاگادارکردنە فەرمییەیل.
ئاژانسەیل گەشتکردن لە بەغداد و نەجەف و دیوانیە هوشیاری دان لە کاریگەری بڕیارەگە لەبان کاریان، وە تایبەت کە هامشوو ئاسمانی بنەمای چالاکییەگەیان دروس کەێد، لە وەختیگ شایەت گەشت هشکانی وژاردەیگ سەخت بوود ئەرا بیماری و گەوراساڵەیل، وەرد رەسین ماوەی گەشتەگە لە عراقەو ئەرا قوم ئەرا نزیکەی 12 سەعات.
کەرت گەشتکردن لە ناوەین هەردگ وڵاتەگە وە پلەیگ گەورا پشت بەسێدە گەشتەیل ئاسمانی ئەرا زیارەتکارەیل ئیرانی وەرەو مەزارگەیل عراقی و زیارەتکارەیل عراقی وەرەو ئیران، لە وەختیگ سەرچەوەیل خەوەر دان کە بەغداد پابەند بوود وە کۆتوبەنەیل ئەمریکی، هەرچەن رانەگەیانیە وە فەرمی ئەرا رێکارەیلیگ لەی باوەتە لەو وەختە.