شه‌فه‌ق نيوز/ مزاحم ئه‌لحوێت قسه‌كه‌ر وه‌ناو عه‌شاير عه‌ره‌بى له ناوچه‌يل كيشه له‌سه‌ر، وشدارى دا باره‌ى دوباره كه‌فتنه‌وه‌ى ناوچه‌يليان وه‌ده‌س ريكخرياگ تيرۆريستى داعش.
ئه‌لحوێت ئه‌را شه‌فه‌ق نيوز وت: په‌ياممان ئاراسته‌ێ هه‌ردوگ حكومه‌ت له به‌غدا و هه‌ولێر ئه‌كه‌يم ك ئه‌گه‌ر هيزه‌يل پێشمه‌رگه له‌گشت ناوچه‌يل كيشه له‌سه‌ر وه‌ل هيزه‌يل ئه‌منى بڵاو نه‌كريه‌ێد ئه‌را ناوچه‌يلمان، ئه‌وه بايه‌سه به‌غدا فاتحه بخوه‌نێد له‌بان ئه‌و ناوچه‌يله‌و مه‌ردمه‌گه‌ێ.
ئه‌لحوێت وت: ئمڕوو كرده‌وه‌يل داعش خه‌ريكه رووژ وه رووژ زياتره‌و ئه‌دێ و ناوچه‌گه‌يش كه‌فته‌سه مه‌ترسى و دڵه‌ڕاوه‌كى له‌لاى مه‌ردم په‌يا بويه وه بوونه‌ى هه‌ڕه‌شه‌ى مه‌ترسيدار ك باس كوشتن له‌تى ئه‌كه‌ن.
جێ باسه، قسه‌كه‌ر وه‌ناو عه‌شاير عه‌ره‌بى وشدارييش دا له‌وه‌گ داعش تاوان ده‌رهه‌ق مه‌ده‌نيه‌يل ئه‌نجام بيه‌ێد له‌و ناوچه‌يله دوياى زانياريه‌يليگ له‌باره‌ى مبايعه‌كردن و ئنتماى تازه له به‌رژه‌وه‌ندى داعش و زيايبوين لايه‌نگره‌يليان وه بوونه‌ى كزێ هيزه‌يل ئه‌منى و فه‌سيله‌يل حه‌شد شه‌عبى ك وجوود ديرن له‌و ناوچه‌يله.