شه‌فه‌ق نيوز/ عادل عه‌بدولمه‌هدى سه‌رۆك وه‌زيره‌يل ده‌س له‌كاركيشياگ په‌يوه‌ندييگ ته‌له‌فۆنى وه‌ل محه‌مه‌د ته‌وفيق عه‌لاوى سه‌رۆك راسپارياى ئه‌نجومه‌ن وه‌زيره‌يل ئه‌نجام دا.

له‌ى باوه‌ته‌و، نويسينگه‌ى عه‌بدولمه‌هدى له‌ به‌ياننامه‌يگ وت: عه‌بدولمه‌هدى پيروزبايى له‌ عه‌لاوى كردگه‌ وه‌بوونه‌ى راسپاردنى ئه‌را دامه‌زرانن حكومه‌ت تازه‌و ئاشكراى كردگه‌ گشت توانايگى ته‌رخان ئه‌كا ئه‌را سه‌رخستنى له‌ ئه‌ركه‌ ئاينده‌گه‌ى.

به‌ياننامه‌گه‌ هه‌ميش وت: هه‌ردوگلا له‌و په‌يوه‌نديه‌ ريككه‌فتنه‌ له‌بان ديداريگ له‌ يه‌كه‌مين ده‌رفه‌تيگ ئه‌را كاركردن وه‌يه‌كه‌و وه‌و جووره‌گ وه‌ل خواست و داواكاريه‌يل قۆناغ راسپاردن و سه‌رخستن پرووسه‌ى ديموكراسى بگونجيه‌يد وه‌خاسترين شيوه‌.

جى باسه‌، محه‌مه‌د ته‌وفيق عه‌لاوى وه‌زير وه‌رين په‌يوه‌نديه‌يل، تۆماريگ ڤيديۆيى بڵاو كرد و وتاريگ له‌تى ئاراسته‌ى ملله‌ت عراقى كرد وه‌ بوونه‌ى راسپاردنى ئه‌را پۆست سه‌رۆكايه‌تى وه‌ختى حكومه‌ت له‌لايه‌ن به‌رهه‌م ساڵح سه‌رۆك كۆمار عراق.