شەفەق نیوز/ ئیران و عراق، ئمڕوو پەنجشەممە، یاداشتنامەی لەیەک فامستن دووانەکی لە باوەت نواگردن شەپوول خوەڵ و توز واژوو کردن.
یاداشتنامەگە لە لایەن عراقەو لە ری وەزیر ژینگە جاسم عەبدول عەزیز حەمادی و وە لایەن ئیران لە ری سەرۆک رێکخریاگ مقەیەتیکردن ژینگە عەلی سەلاجقە واژوو کریا.
سەلاجقە لە بەیاننامەیگ رووژنامەوانی لە دویای واژووکردنەگە راگەیان، یەکیگ هەرە گرنگترین ئامانجەیل هەرێمی وەزارەت ژینگە چەسپانن لەیەک نزیکەوبوین و تەواوکاریە لەمابەین دو وڵات دووس و برا، وتیش؛ ئی گردەوبوینە دەسپێکیگە ئەرا تەقەلا هاوبەشەیل ئەرا چارەسەرکردن گرفتەیل ژینگە لە ناوچەی خوەرئاوای ئاسیا.
سەلاجقە دیاریکرد، لە ئیران وەڕەنج زانایەیل ناوخوەیی و کۆمپانیایەیل ئیرانی لەماوەی چەن ساڵ دویاییە توەنستنە چەن جویریگ روپووش خوەڵ دروس بکەن ک دوس ژینگەس.