شەفەق نیوز/ شارەزایگ کەشناسی، ئمڕوو شەممە، مەزەنە کرد ک سوو وڵاتەگە بکەفێدە وەر گەردەلۊل خوەڵوتوز نوویگ، لە پارێزگای ئەنبار دەسوەپی کەێد، و خەسیەگەی کەفێدە ناوچەیل باکوور و ناوڕاس، و دیاری کرد ک ئەوەسا خەس بوود، و نووڕستن ئاسۆیی کەمەو کەێد.
پسپۆڕ کەشناسی عەلی جابر زیادی ئەرا ئاژانس شەفەق نیوز وت: گەردەلۊل خوەڵوتوز نوویگ مەزەنە کەس ئیوارەی سوو یەکشەممە بەێد لە وڵاتەگە، لە بەشەیل خوەرئاوای قەزای قائیم لە ئەنبار دەسوەپی کەێد، و لە وڵات شام تیەێدە ناو، و مەزەنە کرد خەس بوود و ئاست نووڕستن بکەێدە کەمتر لە ٣٠٠ مەتر.
زیادی وتیش: خوەڵوتوزەگە وەرەو گشت ناوچەیل باکوور و ناوڕاس قویلەو بوود، و لە شارەیل باشوور کەمتر بوود، و تا نیمەڕو دووشەممە وەردەوام بوود.
زیادی دیاری کرد ک مەزەنەیل دەسنشان داوەزین گەرمی لە رووژ دووشەمە کەن لە ناوچەیل فراوانیگ لە وڵاتەگە، و ئەرا بەنج پلە داوەزێد.