شەفەق نیوز/ ئەندازیار عەدنان غەنام وەڕێوبەر کۆمپانیای گشتی ئەرا پیشەسازیە کانزاگان، یەکیگ لە کۆمپانیایل وەزارەت پیشەسازی و کانزاگان، ئمڕوو یەکشەممە، راگەیان وەردەوامبوین هەناردەی بەرهەم ''بڕایم کۆت'' ئەرا دەوڵەت ئیماڕات.

غەنام لە بەیاننامەیگ ئمڕوو دیاری کرد ک کۆمپانیاگە رووژ پەنجشەممە ١٣ی ئاب ، دەسکردە هەناردەی چین نوویگ رەسیە ٩٢١ تەن لە پێکهاتەی ''بڕایم کۆت'' ک لەلایەن کارەگای قیلی لە قزای فەلوجە لە پارێزگای ئەنبار بەرهەم کریاگە، ئەرا دەوڵەت ئیماڕات، ئەرا وەکارهاوردنی لە جادە سەرەکیەگان.

ئاماژە دا ک کۆمپانیاگا هەمیش توانای ئامادەکردن وهەناردەی پێکهاتەی ''بڕایمەر'' دیرێد، ک جوور قاتیگ دژوە تەڕی وەکارتیەێد، و پێکهاتەی ''کات باک'' ک ئەرا پرشەکردن لەوەخت قیلکردن وەکارتیەێد.