شەفەق نیوز - بەغداد/ واشنتۆن

داتایەیل ئیدارەی زانیارییەیل وزەی ئەمریکی، ئمڕوو یەکشەممە، نیشان دان کە هاوردەیل وڵاتە یەکگرتگەیل لە نەفت خاو عراقی گلەو خواردگە ئەرا سفر ماوەی هەفتەی گوزەشتە، دۊای توومارکردن 51 هەزار بەرمیل رووژانە لە هەفتەی وەرجە خوەی.

 وەپەی ئەو داتایەیلە کە ئاژانس شەفەق نیوز چەوی وەپیان کەفتگە، "ناوەنجی هاوردەیل ئەمریکی لە نەفت خاو لە ماوەی هەفتەی گوزەشتە لە نۆ دەوڵەت سەرەکی رەسیەسە تێکڕای 5.078 مەلیۆن بەرمیل رووژانە، وە بەرزەوبۊنیگ وە بڕ 129 هەزار بەرمیل لە رووژیگ لە هەفتەی وەرجە خوەی کە رەسۊدە تێکڕای 4.949 مەلیۆن بەرمیل رووژانە".

هەمیش هاوردەیل وڵاتە یەکگرتگەیل لە خاو عراقی لە هەفتەی گوزەشتە رەسیەسە سفر، لە وەختیگ هاوردەیلی لە نەفت عراقی ماوەی هەفتەی وەرجە خوەی 51 هەزار بەرمیل رووژانە بۊ.

 ئیدارەگە دیاری کرد کە "فرەترین هاوردە نەفتییەیل ئەرا ئەمریکا ماوەی هەفتەی گوزەشتە لە کەنەداوەو هاتنە وە تێکڕاییگ کە رەسیە 3.423 مەلیۆن بەرمیل رووژانە، و دۊای ئەوەیش ڤەنزوێلا وە تێکڕای 553 هەزار بەرمیل رووژانە، و لە بەرازیل وە ناوەنجی 498 هەزار بەرمیل، و لە غیانا وە تێکڕای 165 هەزار بەرمیل رووژانە".

 وەپەی خشتەگە، "بڕ هاوردەیل ئەمریکی لە نەفت خاو لە مەکسیک رەسیەسە تێکڕای 144 هەزار بەرمیل رووژانە و لە ئەرجەنتین، وە تێکڕاییگ کە رەسیەسە 136 هەزار بەرمیل رووژانە، و لە سعودیە وە تێکڕای 74 هەزار بەرمیل رووژانە، و لە کۆلۆمبیا وە ناوەنجی 68 هەزار بەرمیل رووژانە و لە نەیجیریا وە ناوەنجی 17 هەزار بەرمیل رووژانە".

 ئەمریکا فرەی نەفت خاو و داتاشریاگەیلی لەی دە دەوڵەت سەرەکییە هاوردە کەێد، و خەرجی رووژانەی وڵاتە یەکگرتگەیل لە نەفت وە نزیکەی 20 مەلیۆن بەرمیل مەزەنە کریەێد، و وەی جۊرەیش وە گەوراترین وەکاربەر ئەرا نەفت لە جەهان دانریەێد.