شەفەق نیوز/ دەسڵاتدارەیل فرۆکەوانی مەدەنی لە عراق، بڕیاردا  قەیەغەی گەشتە ئاسمانیەیل تا ساعەت یەک نیمەڕووی ئمڕوو شەممە درویژەوبکەێد، لەدویای ئەوە مەەنەی بارودۆخەگە کەێد لەژیر سای ئاڵشتکاری گورزەیل ئاسمانی و مووشەکی ناوەین ئیسرائیل و ئیران، وەپای سەرچەوەیگ لە وەزارەت گواستنەوە کە وە ئاژانس شەفەق نیوز خەوەردا.

دەسڵاتدارەیل فرۆکەوانی مەدەنی لە بەیاننامەیگ راگەیان قەیەغەی ئاسمانی عراق درویژەکیشێد ئەرا گشت گەشتەیل ئاسمانی هاتن و دەرچگن، تا ساعەت یەک نیمەڕوو وەپای بەغداد، وەپای بڵاوکردن فرۆکەوانی شمارە  A0378/25.

لە بەیاننامەگە ئاشکرایکرد، بڕیارەگە لەوەر پاراستن سەلامەنی و ئاسایش فرۆکەوانی مەدەنیە لە کەشوهەوای عراق، وە مدوو زیایبوین وردەوردەیل هەرێمی لە ناوچەگە، لە چوارچمگ مەزەنەکردن بڕ ئەو رخداریەیلە کە وەردەوامن، وەپای پەیمانەیل ناودەوڵتی کە پشت وەپی بەسرێد لە مژار سەلامەتی فرۆکەوانی مەدەنی.

نویسینگەی راگەیانن سەرۆک وەزیرەیل محەمەد شیاع سودانیش لە بەیاننامەیگ راگەیان وەزارەت گواستنەوە دەسکردیە وە کارکردن دەسوەجی وە هەماهەنگی وەرد لایەنەیل تایوەت هەریەک لە؛ ئۆردن و کوەیت و تورکیا، ئەرا گلەوداین گەشتیارەیل عراقی ئەرا وڵاەگەیان، کە لە هاتنەوە گیرکردنە وە مدوو بەسیان ئاسمان عراق وە مدوو رویداوەیل هەرێمی کۆتاییە.

لە بەیاننامەگە دیاریکریاس، دەسەی حەج و عومرە، وە رێنمایی سودانی و وە هەماهەنگی وەرد وەزارەت گواستنەوە، دەسکردیە وە دووارە راسپاردن ئەو حاجیەیل عراقی کە مەننە لە خاکی پیرۆز و دڵنیابوون لە گلەوخواردنیان ئەرا  میلکان خوەیان.