شەفەق نیوز - بەغداد

عراق پۆست سەرۆک ئەنجومەن باڵوێزەیل وڵاتەیل رێکخریاگ هاوکاری ئیسلامی لە لای رێکخریاگ نەتەوە یەکگرتگەیل ئەرا پەروەردە و زانست و رووشنهویری (یۆنسکۆ) لە پایتەخت فەرەنسا پاریس وەدەس هاورد.

نوێنەر هەمیشەیی عراق لە لای رێکخریاگەگە و سەرۆک ئەنجومەن باڵوێزەیل، ئەسعەد تورکی سواری، لە بەیاننامەیگ  رەسیە ئاژانس شەفەق نیوز وت، ئی پۆستە وە نۆیەم پۆست دانریەێد کە عراق لە ماوەی نزیکەی دوو ساڵ وەدەسی هاوردگە، و وەپای ئەوەگ سەرکردایەتی ئەنجومەن باڵوێزەیل پێکهاتگ لە 57 وڵات ئیسلامی ئەرا ماوەی ساڵیگ تەواو گرێدە دەس.

وتیش؛  لە ماوەی کۆبوینەوەی ئەنجومەنەگە ستراتیژی پێشنیارکریاگ ئەرا قۆناغ ئایندە خستە ڕوی،  پشتیوانی و پاڵپشتی باڵوێزەیل چەن وڵاتیگ وەدەس هاورد، لە ناویان تورکیا، کوێت، مسر، پاکستان، ئازەربایجان، مالیزیا، بەنگلادیش، و ئیران.

لە بەیاننامەگە دیاری کرد  نوێنەر هەمیشەیی عراق لە ماوەی دوو ساڵ گوزەشتە چەن پۆستیگ باڵا لە "یۆنسکۆ" وەرگردبوی، دیارترینیان: سەرۆکایەتی لیژنەی حکومی ناودەوڵەتی ئەرا پتەوکردن گلەوداین موڵکە رووشنهویرییەیل ئەرا وڵاتەیل رەسەن خوەیان (ICPRCP)، و جێگر سەرۆک کۆنگرەی گشتی رێکخریاگەگە ئەرا خول 43ـەمینی وە نوێنەرایەتی گرووپ عەرەبی، لە پاڵ ئەندامێتی  لیژنە تایبەتمەنەیل لە رێککەفتننامەیل، و راسپاردەیل، و کەلەپوور جەهانی، و یادەوەری جەهان.