شەفەق نیوز- بەغداد

داتایەیل چەودیاری کەشوهەوای جەهانی، کە ئمڕوو سێشەممە دەرچگنە، دەرخستن کە دوو ناوچەی عراقی لەناو لیستیگ توومار کریانە کە 15 ناوچە لەخوەی گرێد کە بەرزترین پلەی گەرمی توومارکریاگ لەبان ئاست جەهان لەماوەی چوار و بیس سەعات گوزەشتە.

 بالدی بیکۆن لە بەلیز کەفتە سەرەتای لیستەگە دۊای ئەوەگ 52.3 پلەی سەدی توومار کرد، و دۊای ئەو دیهلەران ئیرانی وە 49.6 پلەی سەدی، ئیجا بستان وە 49.3 پلەی سەدی، لە وەختیگ ئەهواز و سەرپێڵ زەهاو لە ئیران لە پلەی چوارەم و پەنجەم هاتن، وە 49 پلەی سەدی ئەرا هەر یەکیگیان.

 ئەحسای سعودی لە پلەی شەشەم جەهانی هات وە 48.3 پلەی سەدی، وە یەکسانی وەگەرد میهران ئیرانی، لە وەختیگ ئومیدیە و سەفی ئاباد – دیزەفووڵ لە ئیران لە پلەی هەشتەم و نۆهەم هاتن، دۊای ئەوەگ 47.9 پلەی سەدی ئەرا هەر یەکیگیان توومار کردن.

 قەیسوومەی سعودی لە پلەی دەيەم جەهانی هات وە 47.8 پلەی سەدی، و دۊای ئەو کەرعانە لە قەتەر وە 47.7 پلەی سەدی.

 ناسریە ئامادەبۊن خوەی لە پلەی دوازدەم جەهانی توومار کرد، وە پلەی گەرمییگ کە رەسیە 47.6 پلەی سەدی، لە وەختیگ ئابادان ئیرانی لە پلەی سیانزەهەم هات وە 47.5 پلەی سەدی.

 لیستەگە وە سەماوەی عراقی لە پلەی پانزەهەم جەهانی کووتایی هات، دۊای ئەوەگ 47.4 پلەی سەدی توومار کرد، وە یەکسانی وەگەرد رەفحای سعودی کە لە پلەی چواردەهەم هات وە خود پلە.